【竹內結子逝世】《巨星夫婿》/《冰之驕子》/《藉著雨點說愛你》等 5 套「日劇女王」經典作品回顧

By Ella on 28 Sep 2020

Digital Content Writer

竹內結子 27 日於家中離世，終年 40 歲。日本演藝圈痛失一顆星星。竹內結子主演過無數影視作品，為人熟悉，貴為「日劇女王」。依家冇得再睇度佢嘅作品，只能喺以往嘅作品中回憶佢嘅身影。

竹內結子 1996 年憑劇集《新木曜的怪談 Cyborg》出道，其後出演無數影視作品，口碑俱佳，奠定「日劇女王」地位。

Photo from yuko_takeuchi0401@IG

《巨星夫婿》
竹內結子嘅《巨星夫婿》相信係香港人熟悉嘅作品之一，當時嘅竹內結子只有 21 歲。故事講述「櫻庭裕一郎」（長瀨智也飾）係風靡日本嘅年輕歌手，為咗迎合公眾口味，佢必須改變自己原本邋遢、老土嘅形象。直至遇上「新井櫻」（竹內結子飾），佢先至可以做番自己。「裕一郎」決定同「新井櫻」結婚，但受到「新井櫻」父母為難，更被要求入贅。

Photo from Pinterest

《冰之驕子》
2004 年同木村拓哉主演嘅劇集《冰之驕子》奠定竹內結子「日劇女王」嘅地位。故事講述「里中晴」（木村拓哉飾）係冰上曲棍球藍蠍隊隊長，戀愛對佢只係一場遊戲。有一日比完賽之後佢同隊友去酒吧慶功，打賭可唔可以追到吧枱嘅女仔，結果「里中晴」就遇上「亞樹」（竹內結子飾），兩人仲簽下愛情契約。

Photo from 《冰之驕子》

《藉著雨點說愛你》
《藉著雨點說愛你》係竹內結子同前夫中村獅童嘅定情作，可惜兩人最後離婚收場。故事講述「秋穗巧」（中村獅童飾）嘅妻子「榎田澪」去世，自己同 6 歲嘅仔仔「佑司」（武井証飾）相依為命。「榎田澪」臨終前講過第二年嘅雨季就會跟住啲雨點返嚟睇佢哋。雨季嘅時候「榎田澪」真係出現咗，雖然失去所有記憶，不過都好似以前咁照顧兩父子。

Photo from 《藉著雨點說愛你》

《彩虹閃耀夏之戀》
竹內結子同松本潤主演嘅《彩虹閃耀夏之戀》係佢最後一套愛情劇。故事講述二三流演員「楠大雅」（松本潤飾）從小活喺著名演員父親「楠航太郎」嘅光環之下，但其實佢有自己嘅諗法。有一日同朋友去玩跳傘時，控制系統出現問題，發生意外，令佢偶遇年紀比自己大嘅單親媽媽「詩織」（竹內結子飾），並對佢一見鍾情。