精選 5 套韓國電影放假必煲　青年警察/你的婚禮/我的一級兄弟

By Ella on 29 Sep 2020

Digital Content Writer

放假喺屋企唔知有咩做？最好就梗係煲劇喇。近年來除咗韓劇流行之外，韓國電影都非常出色，好似《與神同行》、《炸雞特攻隊》咁，口碑票房都非常好。今次就推薦 5 套韓國熱門電影，等大家放假都有得煲～

《青年警察》
《青年警察》由兩大男神朴敘俊、姜河那主演，淨係聽到佢哋個名都已經想睇喇～故事講述「朴基俊」（朴敘俊飾）同「姜熙烈」（姜河那飾）係警察大學學生，喺學校入面成為咗好朋友。兩人有一日想去識女仔，卻意外目擊一宗綁架案，眼見警方冇即時行動，兩人決定親身上陣......

兩大男神合作，「bromance」係呢套戲入面唯一嘅「感情線」，再睇住佢哋型到爆嘅打鬥場面，真係睇到心心眼～

Photo from 《青年警察》

《霹靂嬌鋒》
《霹靂嬌鋒》由李聖經及羅美蘭主演，少女時代嘅秀英都有份出演㗎。故事講述「朴美英」（羅美蘭飾）婚前係女警機動隊精英成員，婚後調為文職。而「朴美英」嘅小姑「趙智慧」（李聖經飾）係現任刑警隊隊員，因為犯錯而暫時調為文職，同「朴美英」共事。兩人偶然發現一條偷拍性犯罪嘅影片，但基於警察部門冇積極調查，兩人決定聯手搵出幕後黑手。

李聖經今次變身帥氣女警，有唔少打鬥場面，真係非常型格！

Photo from 《霹靂嬌鋒》

《你的婚禮》
《你的婚禮》由朴寶英同金英光主演，係一部看似甜蜜但其實催淚嘅電影。故事講述「韓勝熙」（朴寶英飾）係一個出眾又挑剔嘅女仔，「黃宇延」（金英光飾）十年來一直痴痴地愛住「勝熙」。兩人相識於高中時期，之後到大學，再出埋社會，經歷咗各種陰差陽錯，相愛過，但依然錯過。

小編覺得呢套戲有少少《那些年，我們一起追的女孩》嘅 feel，帶有一種遺憾美。另外，身高 158 cm 嘅朴寶英同身高 188 cm 嘅金英光企埋一齊瞬間形成「最萌身高差」，拍攝一啲 sweet 嘅場面時，睇落更加甜蜜～

Photo from 《你的婚禮》

《我的一級兄弟》
《我的一級兄弟》由「長頸鹿」李光洙及申河均主演，取材自真實故事。故事講述「世河」（申河均飾）係一名肢體殘疾人士，但頭腦非常聰明。「世河」喺福利機構生活嗰陣遇上經常被欺負嘅智障人士「東九」（李光洙飾），「東九」喺一次意外入面救咗「世河」，自此兩人互相幫助，共同生活咗 20 年。然而，福利機構面臨倒閉，兩人將被逼分離，於是「世河」就開始咗守衛計畫。

呢套電影其實非常感人，不過又加插咗啲搞笑位，又笑又喊。而李光洙喺電影入面扮演智障人士，真係入型入格，演技炸裂！

Photo from 《我的一級兄弟》

《熱血青春》
《熱血青春》由男神李鍾碩及朴寶英主演，以八十年代嘅韓國為背景。故事講述「朴英淑」（朴寶英飾）係出名嘅「大姐大」，鍾情於青梅竹馬嘅「花心蘿蔔」「姜仲吉」（李鍾碩飾）。學校當時嚟咗一個轉校生「崔素熙」（李世英飾），「姜仲吉」決定出動追女仔，「朴英淑」看在眼裡非常受傷，後來佢發現「崔素熙」不可告人嘅秘密，但反而被誤會。