《返校》劇集版 12 月 Netflix 有得睇喇！新故事將延續電影版情節

由赤燭遊戲開發嘅《返校》係一款驚慄遊戲，推出之後好評如潮，後來更改編成同名電影，一樣票房大賣。今次《返校》終於拍成劇集版，12 月 5 日喺 Netflix 就有得睇喇！大家準備好喺被竇入面煲劇未？

電影《返校》係校園懸疑歷史驚悚片，講述台灣白色恐怖時期，一群左派份子受到政府懲治嘅故事。1962 年台灣正值白色恐怖時期，政府將好多書列為禁書，不過喺呢個高壓嘅環境下依然有好多人舉辦讀書會，追求自由，翠華中學老師「張明暉」（傅孟柏 飾）正係其中一人。女主角「方芮欣」（王淨 飾）係翠華中學學生，經「殷翠涵」（蔡思韵 飾）引介之下認識咗「張明暉」並發生師生戀。

Photo from 電影《返校》

Photo from 電影《返校》

後來因為一連串事件令「方芮欣」誤會「殷翠涵」，更利用「魏仲廷」（曾敬驊 飾）取得讀書會情報，繼而舉報，令到學校讀書會成員，包括「張明暉」在內都被拘捕處決。最後「方芮欣」因為愧疚而自殺。

Photo from 電影《返校》

電影票房大賣，仲獲得第 56 屆金馬獎 12 項提名，係該屆入圍獎項最多嘅電影。

今次《返校》劇集版嘅背景一樣係翠華中學，不過故事就有啲唔同，講述「方芮欣」死後，教學大樓經常傳出鬧鬼傳聞，30 年後，轉校生「劉芸香」（李玲葦 飾）誤闖教學大樓，遇見被封印嘅師姐「方芮欣」（韓寧 飾）嘅鬼魂，逐步揭開 30 年前嘅歷史悲劇，講述番當時學生同老師遭到逼害嘅事蹟。

Photo from hanninghanning@IG

Photo from weiweililynana@IG

另外 30 年後嘅「魏仲廷」將由吳昆達飾演，延續原作遊戲中出獄嘅劇情。

Photo from 劇集版《返校》

劇集版《返校》一共 8 集，12 月 5 日夜晚 9 點喺 Netflix 首播，逢星期六更新。大家準備好驚住睇未？

Photo from 劇集版《返校》

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）