潤肺、增強抵抗力湯水/甜品食譜！簡單易煲　啱晒一家人入秋後飲

近日相信大家都感受到天氣明顯轉涼，唔少人出門都會準備多件外套，以備不時之需。其實除咗喺服裝上有所準備之外，仲有唔少潤肺，有助增強抵抗力嘅湯水啱大家喺入秋後可以煲嚟飲㗎！

小編今次就搵嚟潤肺、增強抵抗力嘅湯水推介畀大家！

蘋果雪梨養陰清火湯（懷孕者亦可飲用）（2-3人用） 

材料：蘋果 3個，雪梨 3個，無花果 3粒，海玉竹 10克，沙參 10克，百合 10克，麥冬 5克，淮山 15克，栗子 8粒，果皮、南北杏 適量

做法：蘋果、雪梨切塊，備用。其他材料洗淨，將所有材料放入，煲 2 小時即可。

註：感冒多痰者不宜飲用

川貝燉桔餅潤肺方

適合肺弱、時常咳嗽、呼吸系統不強、痰多、沙聲、老烟槍等人士飲用。

材料：桔餅 2粒，南杏 10克，北沙參 12克，川貝 8克，冰糖 適量

做法：材料洗淨，以500 ml水，燉 1 小時即可。

註：服用時，忌食生冷及油炸食物

蟲草花淮山煲雞湯 （3-4人用）

Photo from Printerest

蟲草花配合淮山，杞子等一系列食材既止咳潤肺，亦健脾補腎，啱晒容易成日腰痠背痛嘅打工一族。

材料：雞肉 600克，蟲草花 20 克，龍眼肉 10克，淮山 10 克，蓮子 10克，杞子 10克，茨實 20克，薑 4片，水 1000 ml

做法：雞肉汆水後撈出瀝乾備用。其他材料洗淨略浸，生薑去皮切片。將所有材料放入，煲 2 小時，加鹽調味即可。

木瓜雪耳豬展湯（3-4人用）

Photo from Printerest

雪耳可以話係平民燕窩嚟，同木瓜一樣含有豐富嘅氨基酸，有效滋陰潤肺及健脾，最啱就係天氣乾燥時飲用。

材料：木瓜仔 1個，雪耳 適量，豬展1件，南北杏 適量，蜜棗 2粒，去核紅棗 3粒，水 1000 ml

做法：木瓜仔及雪耳切件備用，再將 1000 ml水煮滾後放入除雪耳外所有材料，以大火煮 10 分鐘再以小火煲 15 分鐘，加入雪耳後以小火煲 45 分鐘，加鹽調味即可。

海星雪梨蘋果海底椰豬展湯（5-6人用）

海星有潤肺養顏，化痰止咳嘅功效，再加上蘋果，雪梨等清潤嘅食材，真係啱晒依家依啲天氣飲用。

材料：海星 2 隻，雪梨乾 40 克，乾海底椰 40 克，去核椰棗 2顆，去核紅棗 2 顆，果皮 1 瓣，蘋果 6 個，豬展 400 克，水 約3500 ml

做法：蘋果切件去核備用。將海星及果皮浸軟後，去除海星中嘅內臟，而果皮喺浸軟後去除白色嚢嘅部分。海星及豬展均需汆水備用。準備好材料後，將材料全部放入煲中，煲約 2.5 小時後，加鹽調味即可。

而除咗湯水之外， 鍾意食甜品嘅大家仲可以試吓自己喺屋企整依款滋潤嘅糖水添，材料簡單，整畀家人或另一半食，真係唔止滋潤，食嗰個仲暖入心添呀！

銀耳紅棗蓮子湯 （5-6人用）

Photo from Printerest

材料：白木耳 1 朵，鮮蓮子 200 克，紅棗 7 顆，杞子 3 克，棕櫚糖或冰糖 適量

做法：鮮蓮子、紅棗、杞子洗淨備用。白木耳沖淨後以冷水浸泡約 1 小時；再去除白木耳芯（黃色部分），用手撕成小塊。將白木耳放入鍋中加入水，以中火煮滾後轉小火慢燉 10 分鐘（水必須蓋過木耳），再加入蓮子與紅棗燉 20 分鐘，加糖調味後放入枸杞煮滾即可。

紅棗桂圓燉雪梨（1 人用）

雪梨有效潤燥，但屬涼性，故加入紅棗可有助緩和。

Photo from Alice Yuen 授權提供

材料：雪梨或鴨梨 1 個，冰糖 適量，杞子 適量，去核紅棗 3 粒，龍眼肉 3 粒

做法：將梨沖洗乾淨，於頂部三分一處切開，頂部留著備用。 挖空梨芯，以竹籤喺梨身刺數個小孔，兼喺梨中放入冰糖、去核紅棗、龍眼肉、杞子，將頂部蓋上，放入碗中，加入飲用水，隔水蒸約 1 小時即成。

不過小編都要提提大家：每個人體質不同，如有疑問，請先向註冊中醫師查詢。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）