【必睇電影】5套經典電影10月重返大銀幕　港產片/奧斯卡得獎作品/荷里活製作都有！

By Charlie on 07 Oct 2020

Digital Content Writer

疫情底下，雖然好多電影都延遲咗上映日期，但都好彩有唔同嘅經典電影重返大銀幕！喺屋企睇 Netflix 睇到厭？不如入戲院睇以下呢 5 套電影，感受下氣氛啦～

1. 末代皇帝溥儀（The Last Emperor）（1987年電影）

Photo from hkmovie6

《末代皇帝溥儀》由名導演貝托魯奇（Bernardo Bertolucci）執導同尊龍主演，仲有音樂大師坂本龍一負責電影配樂。佢除咗係第一部由西方角度切入中國近代歷史嘅電影之外，佢仲係少有可以喺故宮取景嘅電影，真實感提升唔少！電影仲榮獲第 60 屆奧斯卡 9 項大獎，真係好值得入場一睇。

Photo from 《末代皇帝溥儀》

電影拍出咗清代最後一位皇帝溥儀嘅一生，佢歷經唔同嘅朝代變更，但無論係邊個執政，佢都好似一隻籠中鳥咁，無辦法主宰自己嘅命運。透過電影，我哋或者可以更加理解呢個悲劇人物嘅故事同無奈。

2. 天若有情（1990年電影）

Photo from hkmovie6

《天若有情》係早前病逝嘅陳木勝導演首次執導嘅電影，而呢套電影亦令劉德華同吳倩蓮成為經典嘅螢幕情侶，更加令劉德華獲得「華 Dee 」一稱！而華 Dee 喺戲入面著住牛仔褸踩住電單車嘅 look 亦成為當時嘅潮流指標～

Photo from 《天若有情》

電影講述黑社會出身嘅華 Dee（劉德華飾）喺搶劫珠寶行時脅持咗有錢女 Jojo（吳倩蓮飾）做人質，而華 Dee 同 Jojo 喺期間產生感情，華 Dee 仲因為包庇 Jojo 而受到黑白兩道嘅追捕同威脅，兩人結局可歌可泣。

3. 驕陽似我（Good Will Hunting）（1998年電影）

Photo from hkmovie6

《驕陽似我》由麥迪文（Matt Damon）同已故喜劇天王羅賓威廉斯（Robin Williams）主演，並由蝙蝠俠賓艾佛力（Ben Affleck）負責編劇。呢部勵志電影喺奧斯卡有 9 項入圍，最後羅賓威廉斯更憑住 Sean 一角拎到最佳男配角獎。

Photo from 《驕陽似我》

電影講述數學神童Will（Matt Damon 飾）脾氣暴躁，而佢喺教授 Lambeau 嘅介紹之下認識咗心理學教授 Sean（Robin Williams 飾），兩人由本身嘅對峙關係轉化成跨年齡嘅友誼，而 Will 亦終於樂意打開心窗，真實咁面對自己，Sean 亦都喺輔導 Will 期間慢慢喺喪妻之痛行返出嚟。

4. 無痛失戀（Eternal Sunshine of the Spotless Mind）（2004年電影）

Photo from hkmovie6

由占基利（Jim Carrey）同琦溫斯莉（Kate Winslet）主演嘅《無痛失戀》事隔 16 年重新喺大銀幕上映！呢部由米歇爾哥治（Michel Gondry）執導嘅電影集愛情同科幻於一身，因為佢入面探討咗記憶清洗。如果有機會嘅話，唔知你會唔會選擇刪走一段痛苦回憶呢？

Photo from 《無痛失戀》

電影講述情侶 Joel（Jim Carrey飾）同 Clementine（Kate Winslet 飾）因為一次爭執而分手，令到雙方都決定到洗腦診所清洗走佢哋之間嘅回憶。由於清洗記憶嘅同時係需要重播一次記憶，而 Joel 亦喺回憶入面發現自己對 Clementine 嘅感情，所以佢就希望盡力保存僅有嘅記憶！