2020 上半年韓劇收視 Top 10　《愛的迫降》、《夫婦的世界》都唔係第一！

By Ella on 09 Oct 2020

Digital Content Writer

2020 年咁就過咗一半有多，今年有好多韓劇都成為熱門話題，《愛的迫降》、《夫婦的世界》等韓劇都 hit 爆。韓國尼爾森調查近期公布咗今年上半年嘅追劇排行榜，《愛的迫降》同《夫婦的世界》竟然都唔係冠軍！到底冠軍係邊套呢？！

第十位《無人知曉》（《아무도 모른다》）
《無人知曉》係一個懸疑追兇推理故事，由韓國神劇《Sky Castle》中飾演「金老師」一角爆紅嘅金瑞亨出演女主角「車英真」。故事講述「車英真」因為兒時好友被謀殺，從此對人非常冷漠，後來做咗警察，因為一宗兒童墜樓案而勾起佢傷心嘅回憶，因此佢決定徹查呢單案件。

金瑞亨絕對係呢套劇嘅一大看點，佢本身氣場就超勁，今次個刑警 look 真係好型啊！

Photo from SBS

第九位《Good Casting》（《굿케스팅》）
《Good Casting》係一部輕鬆嘅搞笑喜劇，由崔江熙、柳仁英及金智英主演。故事講述「白燦美」（崔江熙飾）係國情院女探員，因為作戰失誤被退為文職，一次因緣際會下重返前線，仲同「林藝恩」（柳仁英飾）、「黃美順」（金智英飾）組成「大媽間諜三劍客」。佢哋三個係年近 40 嘅大媽，平時係單親媽媽、家庭主婦，連屋企人都唔知佢哋嘅身份，三個女特務搞笑無厘頭，劇情笑料百出。

《Running Man》常客李相燁都有出演㗎～佢飾演男主角「尹錫浩」，係科技公司嘅代表理事，鍾意「白燦美」。

Photo from SBS

第八位《The King：永遠的君主》（《더 킹：영원의 군주》）
《The King：永遠的君主》係男神李敏鎬退伍後嘅回歸作，搭檔「鬼怪新娘」金高銀出演。故事以「平行世界」為背景，係一部時空穿越劇，非常燒腦！故事講述平行時空之門被打開，兩個世界有咗交集，大韓帝國皇帝「李袞」（李敏鎬飾）偶然之下穿越到大韓民國，遇上刑警「鄭太乙」（金高銀飾），兩人展開一段愛情故事並聯手對抗大反派。

Photo from SBS

劇集播出之前話題性非常高，畢竟係男神李敏鎬同金高銀合作，加上係「金牌編劇」金銀淑嘅作品，佢寫過無數大熱韓劇如《太陽的後裔》、《鬼怪》等，所以劇集未播出前討論度非常高。不過播出之後，韓國網民表示劇集太燒腦、太複雜，而且李敏鎬同金高銀冇 CP 感，所以韓國當地嘅收視並不如預期中理想。不過李敏鎬同金高銀本身海外人氣非常高，所以劇集喺亞洲各地嘅反應相當唔錯。

Photo from SBS

第七位《Hyena：富豪辯護人》（《하이에나》）
《Hyena：富豪辯護人》由《與神同行》嘅朱志勛同《Signal》嘅金惠秀主演，係一部輕鬆搞笑嘅律師職場劇。金惠秀飾演嘅「鄭金子」係一個為錢不擇手段嘅小律師；朱志勛飾演嘅「尹熙材」係律師界嘅王牌。故事講述「鄭金子」為咗勝訴，欺騙咗精英律師「尹熙材」，兩人因而展開又愛又恨嘅糾葛。

朱志勛因為《與神同行》而爆紅，金惠秀嘅《Signal》口碑都相當好，兩人都係實力派演員，絕對係呢套劇嘅看點。

Photo from SBS

第六位《機智醫生生活》（《슬기로운 의사생활》）
《機智醫生生活》由曹政奭、柳演錫、鄭敬淏、金大明及田美都主演，講述 5 位相識 20 年嘅醫生之間嘅友情，同埋喺醫院發生嘅一啲溫馨故事。呢套劇冇醫院鬥爭、勾心鬥角，只係圍繞住呢五個平凡嘅醫生，佢哋就好似我哋身邊會出現嘅人咁，平凡但溫暖。劇集大受好評，嚟緊仲會開拍第二季！

Photo from tvN

第五位《梨泰院 Class》（《이태원 클라쓰》）
《梨泰院 Class》由男神朴敘俊同金多美主演，改變自同名漫畫。故事講述「朴世路」（朴敘俊飾）喺梨泰院開咗間餐廳，但係遇上財閥嘅阻攔，不過佢同一班熱血嘅朋友一齊跨過重重障礙並成功逆襲，仲同一直鍾意自己嘅「趙以瑞」（金多美飾）展開一段並肩作戰嘅愛情故事。

Photo from JTBC

《梨泰院 Class》漫畫本身就擁有超高人氣，所以劇集播出之前討論度已經非常高，播出之後果然 hit 爆，「朴世路」嘅 icon 「栗子頭」仲成為熱潮，好多男朋友都被女朋友逼去剪「栗子頭」～

Photo from JTBC

第四位《奇蹟拍檔》（《스토브리그》）
《奇蹟拍檔》由南宮珉主演，係一部熱血職人劇。講述職業棒球隊「Dreams」係一個長年排名倒數第一嘅球隊，「白勝秀」（南宮珉飾）被派嚟做團長，然而佢其實係棒球門外漢，不過最後都帶領球隊跨過重重關卡，令球隊起死回生。南宮珉係收視保證，果然名不虛傳，劇集反應相當熱烈，收視狂飆。

Photo from SBS

第三位《愛的迫降》（《사랑의 불시착》）
《愛的迫降》播出嗰陣絕對可以用「瘋狂」嚟形容，劇集由韓國「元祖男神」玄彬、「凍齡女神」孫藝真主演，係一部浪漫愛情故事。故事講述南韓財閥「尹世理」（孫藝真飾）因一場降落傘意外而誤墜北韓，遇上北韓軍官「利政赫」（玄彬飾），兩人展開秘密嘅南北韓禁忌之戀。劇集題材大膽，提及南北韓之間嘅關係，因此關注度非常高。

Photo from tvN

玄彬同孫藝真再度合作，互動甜蜜，又再傳出緋聞，不過雙方公司都否認，但係粉絲依然希望兩人可以假戲真做！

Photo from tvN

第二位《夫婦的世界》（《부부의 세계》）
《夫婦的世界》係一部講述婚外情同復仇嘅劇集，由金喜愛、朴海俊及韓素希主演。故事講述「池善雨」（金喜愛飾）發現丈夫「李泰伍」（朴海俊飾）同「呂多景」（韓素希飾）出軌，因此同丈夫反目成仇並決定報復。劇集仲因為有大尺度嘅床戲，而被列為「19 禁」。

Photo from JTBC

雖然劇情狗血，不過反轉嘅劇情令人「一追再追」，加上一眾演員嘅演技非常了得，「小三」韓素希仲因此而爆紅。

Photo from xeesoxee@IG

第一位《浪漫醫生金師傅 2》（《낭만닥터 김사부 2》）
收視冠軍由《浪漫醫生金師傅 2》奪得！《浪漫醫生金師傅》第一季已經好評如潮，第二季再創新高。《浪漫醫生金師傅 2》由第一季嘅靈魂人物韓石圭帶領第二季加入嘅李聖經同安孝燮出演，講述喺偏遠地方石壇醫院工作嘅天才醫生「金師傅」（韓石圭飾）同年輕醫生「車恩彩」（李聖經飾）、「徐優真」（安孝燮飾）之間嘅故事，醫院每日面對突發嘅醫療事件，劇情緊張，亦不乏感人嘅故事。