2020 上半年10 大日劇收視排行榜　《天堂的天使》/《BG～身邊警護人～》都唔夠依套勁！

2020 年話咁快就已經剩番兩個半月，今年除咗韓劇引起唔少人嘅話題之外，其實今年嘅日劇都唔輸損㗎，如《天堂的天使》、《默默奉獻的灰姑娘 醫院藥劑師的處方箋》、《超級特派員 2》、及《MIU404》都引起咗唔少話題。不過根據日劇嘅平均收視嚟睇，以上所提到嘅都唔係依套續集嘅對手嚟，佢每集首嘅收視都有20%以上，到底係邊套咁勁呢？！

第十位《天堂的天使》（又譯：《戀愛可以持續到天長地久》）

故事講述女高中生佐倉七瀨（上白石萌音飾）為救路人認識醫生天堂浬（佐藤健飾）, 為咗可以再見天堂浬, 花5年時間成為護士, 終於同天堂浬再次見面，但估唔到佢竟然係個冷酷毒舌嘅大魔王, 而去到同一科室後天堂更非常嚴格咁訓練佐倉七瀨，兩人嘅互動充滿火花......

故事中佐藤健飾演嘅高冷醫生聰明又毒舌，雖然成日嚴厲咁對上白石萌音，但二人嘅浪漫互動真係睇到大家少女心爆發！

第九位《MIU404》

由金牌編劇野木亞紀子執筆，綾野剛和星野源主演，故事圍繞警視廳機動搜查隊新設嘅第 4 機搜，伊吹藍和志摩一未兩個性格完全唔同嘅刑警，喺機緣巧合之下成為拍檔，一同努力喺當更嘅24小時內查出案件真相。

其實《MIU404》和《法醫女王》喺劇中係有聯動，兩套日劇嘅情節設定喺同一個世界中，每集為一個獨立案件，直到第三集終極 boss 現身，貫穿整部日劇。

第八位《刑警 7 人 6》

《刑警七人》由 2015 年開播，今年已經嚟到第 6 季喇！故事嘅設定同上季一樣，以保管及管理搜査資料嘅「刑事資料係」所屬刑警天樹為中心，組成「專從搜查班」挑戰困難案件，今次主線為被稱為「0A」嘅已解決案件及沒有刑事成份嘅搜查資料被盜，依啲資料隱藏住錯綜複雜嘅謎團，以此為主軸再加上一集一單元案件而成。

第七位《超級特派員 2》

日劇女王篠原涼子相隔 13 年再次演出續集，第 2 季繼續飾演喺每間公司只會做 3 個月、身懷多項資格並擁有極高工作能力嘅 A 級特派員大前春子，但面對令和時代嘅職場改革與科技進步，佢又會點解決呢？！

第六位 《忒修斯之船》
《忒修斯之船》日本新一代「國民男友」竹內涼真主演，扮演穿越到 1989 年嘅男主角，想找出父親殺人事件嘅真相，並且嘗試扭轉命運。

雖然題材比較黑暗沉重，但加上一眾好演技嘅配角，如：上野樹里、榮倉奈奈及鈴木亮平等，真係都唔知睇得人先定睇劇情先呀！

第五位《特搜 9 season 3》

《season 3》中每個刑警嘅個性更加光鮮亮麗，即使互相碰撞亦要挑戰解決案件嘅特搜班成員會更加全力奔走，逼近事件真相，以最大限度地發揮每個人潛力嘅故事。

第四位《相棒 18》

《相棒 18》係一部結合刑事同推理嘅電視劇嚟，故事以日本最北嘅架空之島「天禮島」為舞台，本應去完倫敦旅行後回歸嘅右京失蹤，亘為咗搵到佢嘅下落追查到天禮島，並遇上「某人」，同時又出現不可思議嘅連續殺人事件，當中涉及島中嘅秘密及能搖動國家嘅陰謀，以前所未見嘅「主角失蹤」設定展開本季嘅序幕。

第三位《我的家政夫大叔》

《我的家政夫大叔》由去年閃婚嘅多部未華子主演，講述工作能力出眾但不懂做家務嘅 OL，一日家中竟然出現家事萬能嘅大森南朋，誤打誤撞僱用咗家政夫後嘅生活。

依套係一套輕鬆生活小品嚟，仲有帥哥瀨戶康史參演添！

第二位《BG～身邊警護人～》

故事承接上一季，今季木村拓哉就成爲獨立嘅私人BG，與原公司抗衡。

第一位《半澤直樹2》

2013 年播出第一季時已經人氣爆燈，更創下當時單集最高收視日劇紀錄。今次事隔 7 年再度回歸，繼續由堺雅人主演。故事承接上集講述半澤直樹到東京中央銀行總行工作，就住伊勢島酒店爆發嘅巨額虧損等不法事件進行調查，與總行高層嘅大和田常務正面交鋒。

依套劇自確定開拍開始已引起唔少話題，喺開播後更係每集超過 20% 收視，打破自己當年嘅收視紀錄。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）