韓國 5 大熱門綜藝推薦　除咗《Running Man》仲有好多都好好睇㗎

韓流當道，除咗韓劇，韓國綜藝節目都衝出亞洲，《Running Man》相信係香港人最熟悉嘅韓綜，人氣非常高。但其實除咗《Running Man》，韓國仲有好多綜藝節目都好出名，今次為大家推薦 5 套韓國熱門綜藝，等大家追《Running Man》之餘都有其他節目睇吓～

《我獨自生活》（《나 혼자 산다》）
《我獨自生活》喺韓國有超高收視，甚至連續 3 年獲得「MBC 演藝大賞」嘅「年度綜藝節目獎」，可見人氣之高。

Photo from MBC

《我獨自生活》係一嘅真人秀節目，跟拍藝人獨自生活嘅日常情境。目前固定班底有搞笑藝人朴娜勑、演員李施彥、漫畫家旗安 84、歌手 Henry、演員成勛及 Mamamoo 成員華莎。除咗固定班底，節目都會邀請其他藝人拍攝，好似 BIGBANG 成員太陽、演員金英光及《梨泰院 Class》嘅「張根秀」安普賢等都曾出演。

Photo from 《我獨自生活》

出演嘅藝人有時仲會約埋啲圈內好友見面，好似安普賢就約埋 EXO 成員世勛一齊去露營，可以見到明星私下交情之外，仲可以見到鏡頭下藝人私下日常生活嘅樣，真係新穎得嚟又滿足到粉絲嘅好奇心，難怪收視一直高企。

《新西遊記》（《신서유기》）
《新西遊記》嘅火熱程度由佢依家已經拍到第八季就可以知道～《新西遊記》係一個真人秀遊戲節目，目前固定班底有搞笑藝人姜虎東、李壽根、水晶男孩成員殷志源、SJ 成員圭賢、Winner 成員宋旻浩及 Block B 成員P.O。成員要通過唔同遊戲嘅勝利去取得 7 粒龍珠，集齊 7 粒龍珠之後，節目組就會實現每個成員嘅一個願望。

Photo from tvN

節目嘅一大看點在於每一季都會有唔同嘅主題，成員需要 cosplay 唔同人物，造型非常搞笑！《新西遊記》第五季曾來港拍攝，嗰季嘅主題係「鬼神特輯」，成員們分別 cosplay 成殭屍、吸血鬼及陰間使者等喺香港街頭拍攝。

Photo from 《新西遊記5》

早前《新西遊記》第八季都開播咗啦！逢星期五晚上 9 點 10 分播出，有興趣嘅朋友要留意啦！

《認識的哥哥》（《아는 형님》）
《認識的哥哥》係一個脫口秀節目，主持班底有 SJ 成員金希澈、搞笑藝人姜虎東、李壽根、李尚敏、金榮澈、徐章勛及歌手閔庚勛。節目以高校形式進行，主持同嘉賓都會著住高中校服拍攝，嘉賓飾演轉校生同主持人進行問答環節，仲會有小表演同遊戲。好多人氣偶像、演員都曾出演，好似 EXO、BTS及少女時代等。

Photo from JTBC

《我家的熊孩子》（《미운 우리 새끼》）
《我家的熊孩子》係一個真人秀節目，由申東燁及徐章勛主持，固定班底有金希澈、金鍾國、洪真英、朴修弘及李太成。節目搵嚟以上成員嘅媽媽喺錄影廠到觀察兒子日常生活，所有成員都係未婚，媽媽們經常喺節目到表達擔心。

Photo from SBS

金鍾國更加喺節目中表現出對健身嘅熱愛，不枉係《Running Man》入面嘅「老虎」。

另外，金鍾國同洪真英因為拍攝呢個節目而被撮合成一對，雖然只係大家開玩笑，不過好多粉絲都希望兩人真係可以一齊～洪真英之後上《Running Man》都 keep 住同金鍾國開玩笑。

《一日三餐》（《삼시세끼》）
《一日三餐》係一個自給自足生活嘅實境秀節目，每一季都會搵唔同嘅藝人去漁村、農村及山村生活，藝人必須靠當地有嘅材料準備一日三餐。人氣演員南柱赫、尹均相及朴素丹都曾出演。望住藝人喺農村生活，種吓菜釣吓魚，煮吓飯咁，節目節奏輕鬆，有時睇睇吓都幾治癒㗎。

Photo from tvN

尹均相出演嗰陣仲搵埋李鍾碩做嘉賓，展現兩人嘅兄弟情。

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）