Pantone新色「月經紅」　專屬女性的顏色！望為月經去除污名

雖然依家已經係 2020 年，但社會好似對月經依然存有負面印象，亦會以唔同嘅名去代替「月經」二字，如「大姨媽」或「嚟 M」等。有見及此，全球顏色權威 Pantone 最近就同月經杯品牌 Intimina 合作推出全新顏色「月經紅」（Period），以去除社會對月經嘅負面印象。

Photo from Pantone

官方指普遍女性都覺得月經係一件好難以啟齒嘅事，所以就為月經改好多代名詞。有啲國家甚至會有「月經歧視」，如玻利維亞禁止衛生巾同其他垃圾放埋一齊、馬拉威就嚴禁女性喺月經期間同男性講嘢等。

Photo from Pinterest

官方表示女性應該對月經感到驕傲，因為佢係孕育生命嘅象徵！所以 Pantone 希望用「月經紅」色去除污名，話畀大眾知道月經係正常嘅生理現象，女性係唔需要對此感到羞愧。

Photo from Pantone

Photo from Intimina

其實 Pantone 不時都會以顏色去作勉勵同教化社會之用，例如 2019 年嘅年度顏色「活力珊瑚橙」（Living Coral）就係希望大家保持活力同積極，同時藉珊瑚去帶出保護環境嘅訊息。

Photo from Pantone

至於今屆嘅年度顏色「經典藍」（Classic Blue）就係勉勵大家要喺急速變化嘅社會之中保持沉穩同平靜。

Photo from Pantone

希望社會可以慢慢改變對月經嘅態度啦～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）