宮崎駿吉卜力工作室再公開 6 套動畫電影 Wallpaper免費下載　幽靈公主/貓之報恩/夢幻街少女

早前吉卜力工作室就喺其官網公開咗 8 部宮崎駿動畫電影名場面嘅高解像度 wallpaper 免費畀大家 download後，而近日佢哋又再公開另外 6 套著名動畫《幽靈公主》、《哈爾移動城堡》、《貓之報恩》、《夢幻街少女》、《隔壁的山田君》、《ギブリーズepisode2》等電影名場口嘅 wallpaper 畀大家免費下載～

今次同上次一樣，每套電影都會有 50 張，共 300 張解像度高達 1920 x 1080 嘅高清 wallpaper 畀大家免費 download。

Photo from ghibli.jp

《哈爾移動城堡》
故事改編自英國奇幻文學《魔幻城堡》，講到 19 世紀嘅歐洲出現一座識移動嘅城堡，女主角蘇菲意外被軍官搭訕，幸得城堡嘅主人哈爾拯救，但卻被荒野女巫報復下咒，令其變老。因此蘇菲決定離家出走，卻嚟到移動城堡生活。

《幽靈公主》
蝦夷族少年阿席達卡被邪魔神詛咒，為解開詛咒踏上旅程來到「達達拉城」，得知黑帽大人為奪取資源而傷害森林神祇後，遇上由犬神養大嘅幽靈公主，一同捲入人類和森林嘅戰爭。

《夢幻街少女》
講述愛閱讀嘅女主角月島霞，常喺圖書館借書時，發現借書卡上常有男主角天澤聖司嘅名字，喺一次迷路嘅情況下阿霞意外發現咗一間神秘精品店「地球屋」，繼而得知天澤聖司係店主嘅孫，兩人逐漸認識且互相影響，最終一同向各自嘅夢想努力發展嘅愛情故事。

《貓之報恩》
女主角小春意外拯救咗一隻嚟自貓王國嘅王子，王子為報恩希望小春嫁給自己，小春更被強行帶往貓國，漸漸長出鬍鬚及耳朵變成真正嘅貓，但想變回人類就需要喺天亮之前回到人類世界。

《隔壁的山田君》
故事以平凡家庭山田一家來表現出日常裡嘅各種趣事。故事情節唔同以往從頭貫徹到尾嘅長篇劇情架構，而係匯集四五十來回嘅短篇單元、再依各短篇嘅劇情相關性分類結合成數個大段落。

《ギブリーズepisode2》
故事以角色野中君為主角，描述佢喺 Ghibli 工作室中遭遇嘅各種趣事。

今次又有成 300 張圖咁多，睇嚟又會係新一輪改圖熱潮喇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）