12 星座 2021 年運勢　水瓶座整體運勢低迷？白羊座愛情事業兩得意？

眨吓眼 2020 年就嚟完，今年全球都過得好辛苦。2021 年就嚟到，相信大家都會好奇新一年嘅運勢如何，今次就睇吓十二星座新一年嘅運勢，到底邊個星座會笑到最後呢？

白羊座
白羊座 2021 年嘅整體運勢波動比較大，上半年運勢唔錯，不過下半年運勢就麻麻哋。上半年愛情事業運勢非常強勁，所以一定要把握好！工作順利，有望突破事業瓶頸，而且感情方面仲會有好好嘅收穫。

不過到下半年整體運勢就會下滑，工作上可能會有少少阻滯，要小心人際關係。金錢方面都要留意吓，唔好洗太多錢啊～感情方面，已婚或者有伴侶嘅白羊座好容易有第三者嘅介入，所以要小心啲，如果遇到問題就要「快刀斬亂麻」啦！

Photo from iam_joechen@IG

金牛座
金牛座 2021 年整體運勢穩定。感情方面，已婚嘅金牛座要小心啲，要抵擋外界誘惑。喺學習方面，仲讀緊書嘅金牛座 2021 年嘅學習情況會非常突出，學習效率會提高，喺學習上會得到好好嘅回報。

工作方面，金牛座會遇上巨大嘅壓力，身心疲憊。不過千萬唔好為咗工作而忙壞身子，要鍛鍊好身體先有精力應付工作，而且都要識得釋放壓力，身心健康係最重要的！

Photo from roxannetong@IG

雙子座
雙子座 2021 年嘅運勢會有好大嘅波動，遇到好多嘅挑戰，好多意想不到嘅事情會發生。工作方面，雙子座會遇上好多志同道合嘅朋友，會令到工作上有進步。雙子座亦都會喺生活上意外地發掘一個新領域，令生活變得豐富。

不過雙子座要留意，千萬唔好過份玩弄自己嘅小聰明，否則會遇到大問題。

Photo from charmaine_sheh@IG

巨蟹座
巨蟹座 2021 年嘅整體運勢低迷，由年初到年尾仲會持續下降，會遇到各種唔好嘅事情及一啲意想不到嘅變故。

工作方面，巨蟹座會非常忙碌但唔會有好大嘅收穫，所以要有明確嘅方向，唔好令自己迷茫。金錢方面要小心，唔好太大洗！雖然 2021 年運勢麻麻，不過都要保持心境開朗，畢竟有時心情都會影響表現㗎。

Photo from actorleeminho@IG

獅子座
獅子座 2021 年嘅運勢會大起大落，要做好心理準備，尤其係下半年。獅子座新一年會遇到好多小人，可能會耍好多花樣，獅子座千萬要小心，保持克制、低調，要懂得收斂自己嘅鋒芒。

另外，獅子座都要小心，唔好過份自信，適當時候要聆聽他人嘅意見，否則會做出錯誤嘅選擇，對自己造成損失。工作方面，獅子座可能會受到重創，所以一定要搵到問題嘅根源先可以走出困境。

Photo from gem0816@IG

處女座
處女座 2021 年上半年同下半年嘅運勢會截然不同，上半年唔太理想，會遇到好多挫折，好多事都不太如意，但只要堅持落去，下半年會有翻天覆地嘅變化。

工作方面，有機會升職加薪，肯努力一定會有好好嘅回報。愛情方面，單身嘅處女座桃花運非常強勁，可以話係「桃花年」，好大機會可以遇到心儀嘅人！

Photo from jolin_cai@IG

天秤座
天秤座新一年運勢起伏較大，需要時刻保持清醒。天秤座時刻都為人著想，新一年要多為自己想想，思考對方嘅動機，保持頭腦清醒。

2021 年，天秤座面對選擇時要果斷啲，唔好猶豫不決，否則會錯過最佳時機，想做就做，唔好成日瞻前顧後。另外，金錢嘅損失應該係天秤座 2021 年最大鑊嘅事，所以要小心支出，唔好過度揮霍！

Photo from kootinlok_louis@IG

天蠍座
天蠍座新一年整體運勢相當唔錯，各方面都會有所進步。不過要注意嘅係，喺設下一啲目標時要適當地聽吓他人嘅意見，可能會有所幫助。

另外，天蠍座新一年會結交到好多新朋友，可以嘗試一下敞開心扉，眼界都會有所增長。

Photo from choisaaaa@IG

射手座
射手座新一年會充滿挑戰同驚喜。射手座唔可以再好似小朋友咁嘻嘻哈哈，要開始不斷提升自己嘅能力，迎難而上，要認識到當前對自己最重要嘅係咩。

工作方面，只要盡力做好本分，有機會可以有好嘅成果。金錢方面，切記唔好太揮霍，要注意節儉。

Photo from aliaime@IG

摩羯座
摩羯座新一年運勢有起伏，需要經常保持警惕。遇到機會就要把握，但都謹記要低調行事，唔好幫自己添麻煩。新一年人際關係唔錯，遇到困難會有貴人幫助，如果工作需要去見客嘅話，都會有唔錯嘅成績。

感情方面，摩羯座唔好經常胡思亂想，盡量放鬆，珍惜眼前人。

Photo from jaychou@IG

水瓶座
水瓶座 2021 年全年運勢都比較低迷，要積極採取適當嘅應對措施。人際關係方面會比較差，所以同人相處就要格外小心啲。工作方面會遇到難題，但必須積極解決。金錢方面都要小心支出，唔好太揮霍，如果唔係可能會有債務問題！

感情方面，單身嘅水瓶座桃花運一般。至於已婚或有伴侶嘅水瓶座就要注意一下自己嘅脾氣。

Photo from q_gill@IG

雙魚座
雙魚座 2021 年嘅運氣會比 2020 年好少少。新一年雙魚座會接觸到對自己有幫助嘅人，呢啲貴人都會令你成長。新嘅一年，唔好令感情成為負擔，如果緣分未到就唔好勉強。

工作方面，雙魚座會有唔少嘅收穫，就算遇到問題都可以迎刃而解。金錢方面嘅運勢都唔錯，收入應該頗好。

Photo from angelababyct@IG

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）