防彈少年團電視劇《YOUTH》主演確定　花美男雲集！《夫婦的世界》嘅佢都有份！

早前傳出會拍攝防彈少年團嘅成長電視劇《YOUTH》，以 7 位成員為藍本，講述 7 個少年嘅成長故事。而近日終於確定咗由邊 7 個演員出演啦，大熱韓劇《夫婦的世界》嘅佢都有份啊！

《YOUTH》係以「花樣年華」世界觀打造，BTS Universe 係同藝人本身唔同、有獨立敘事嘅世界觀，通過象徵等手法講述各種故事。《YOUTH》講述 7 個少年嘅成長經歷，每個人都有自己嘅傷痛，對彼此嘅痛苦產生共鳴，一齊成長嘅故事。7 個少年係以防彈少年團 7 位成員為藍本，角色都會用佢哋嘅真名，雖然以成員做藍本，不過故事內容同成員本身並無關係。而近日公開嘅演員名單真係令人「眼前一亮」，簡直係花美男雲集！

Photo from bts.bighitofficial@IG

徐志焄飾演「金碩珍」（Jin），係國會議員嘅兒子，典型嘅乖孩子，活喺父親嘅陰影下，走住父親為佢鋪好嘅路。旁人眼裡覺得好完美，但其實佢唔識點樣表達自己嘅感情，轉學之後遇到幾個少年，因為佢哋，「金碩珍」開始識得點樣面對自己嘅情感。徐志焄出演過大熱韓劇《Signal》等多套劇集，係新生代實力派演員！

Photo from jihux@IG

Photo from bts.bighitofficial@IG

盧鍾賢飾演「閔玧其」（SUGA），不善言辭但內心溫暖，不過竟然有傳聞話佢殺咗自己媽媽，仲縱火燒屋。母親離去後只有一台鋼琴陪住佢，直至遇到其他少年，佢先慢慢治癒到內心嘅傷痛。盧鍾賢曾出演《會讀心術的那小子》及《他人即地獄》。

Photo from ro_0116@IG

Photo from bts.bighitofficial@IG

安智浩飾演「鄭號錫」（J-Hope），小時候被人遺棄，但依然有住積極嘅心，而且跳舞非常厲害。安智浩曾出演過電影《與神同行：最終審判》及韓劇《無人知曉》。2004 年出生嘅佢比「鄭號錫」足足細 10 年，佢嘅演繹非常令人期待～

Photo from annjiho2004@IG

Photo from bts.bighitofficial@IG

徐英周飾演「金南俊」（RM），好細個已經要面對生活嘅壓力，做過好多兼職，成日考第一，有責任感。徐英周曾出演電影《霜花店》及韓劇《無人知曉》。

Photo from SBS

Photo from bts.bighitofficial@IG

金允佑飾演「朴智旻」，細個嗰陣因為家人嘅過度保護而有心理創傷，雖然成日面帶笑容，但其實心底裡有講唔出口嘅秘密。

Photo from wells_entertainment@IG

Photo from bts.bighitofficial@IG

鄭宇真飾演「金泰亨」（V），一個遍體鱗傷嘅少年。自從母親離家出走後，父親就 180 度轉變，開始酗酒。而「金泰亨」一直都相信母親有一日會返嚟。

Photo from Big Picture Entertainment

Photo from bts.bighitofficial@IG

《夫婦的世界》中「池善雨」嘅兒子「俊英」全真㥠飾演「田柾國」，因為不安定嘅家庭環境令佢冇感受過幸福，對生存同死亡都冇特別感覺。

Photo from jeon.jin.seo@IG

Photo from bts.bighitofficial@IG

對於劇集用成員嘅真名呢一點就引起防彈少年團粉絲不滿，因為劇情講述有成員被遺棄、成員父親酗酒等呢啲負面嘅嘢，全部不符事實但又用成員真名，覺得並唔合適。

劇集預計明年播出，主演個個都咁靚仔，真係唔睇唔得啦～而且劇集仲係防彈少年團嘅成長電視劇，話題度已經夠晒勁，相信播出嘅時候一定會引起好大迴響！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）