Netflix 7 部人氣韓國愛情喜劇推介　金秘書為何那樣/舉重妖精金福珠

By Ella on 23 Oct 2020

Digital Content Writer

又有連假啦！放假宅喺家最好就係煲劇，睇睇吓好快就可以煲晒成套劇。今次推介 Netflix 7 套人氣韓國愛情喜劇，等大家笑住放連假～

《金秘書為何那樣》
《金秘書為何那樣》改編自同名人氣漫畫，由朴敘俊、朴敏英主演。故事講述非常自戀嘅高富帥集團副會長「李英俊」（朴敘俊飾）得悉同自己共事 9 年嘅萬能秘書「金微笑」（朴敏英飾）要辭職後，對「金微笑」進行挽留甚至追求嘅故事。劇情既搞笑又浪漫，成套劇都充滿住粉紅泡泡，當時兩人喺劇入面嘅親熱戲碼仲成為熱話！

Photo from tvN

《舉重妖精金福珠》
《舉重妖精金福珠》由南柱赫、李聖經主演，係一部青春校園愛情喜劇。故事講述體育大學舉重部嘅「金福珠」（李聖經飾）偶然重遇靚仔暖男小學同學「鄭俊亨」（南柱赫飾），兩人由朋友慢慢進展成戀人嘅故事。兩人喺劇入面嘅互動非常搞笑無厘頭，模特兒出身嘅李聖經仲因為角色而增磅，犧牲頗大。不過成套劇最甜嘅都係南柱赫同李聖經由戲裡甜到戲外，假戲真做，成為情侶。可惜嘅係兩人最終都係分手收場。

Photo from MBC

《觸及真心》
《觸及真心》係「陰間使者」李棟旭同「Sunny」劉仁娜繼《鬼怪》之後再次合作，所以劇集嘅話題度好高，仲被粉絲視為《鬼怪》嘅「番外篇」。故事講述事業走下坡嘅女演員「吳允書」（劉仁娜飾）因新劇角色而去律師樓實習，成為王牌律師「權正祿」（李棟旭飾）嘅秘書，兩人日久生情，發展地下情。今次兩人嘅愛情冇痛苦，只有甜蜜同搞笑，都可以算係對《鬼怪》粉絲嘅一種補償～

Photo from tvN

《她的私生活》
《她的私生活》改編自人氣小說，由朴敏英、金材昱主演。講述非常能幹嘅美術館策展人「成德美」（朴敏英飾）私底下其實係「迷妹」，沉迷偶像，瘋狂追星，仲係「站姐」！後來同新任美術館館長「Ryan」（金材昱飾）擦出火花並相戀，但同時「成德美」要努力掩飾「迷妹」嘅一面。劇中除咗甜蜜嘅戲碼令人心動外，追星嘅戲碼都令粉絲睇到非常有共鳴。

Photo from tvN

《大力女子都奉順》
《大力女子都奉順》由朴寶英、朴炯植主演，係一部結合動作嘅愛情喜劇。講述天生擁有神力嘅「都奉順」（朴寶英飾）意外成為遊戲公司老闆「安敏赫」（朴炯植飾）嘅保鑣，兩人日常相愛相殺並一齊破案。劇集嘅選角可以話係非常成功，「都奉順」擁有無人能及嘅力氣，朴寶英身型嬌小，兩者嘅極端令到角色更加突出。

Photo from JTBC

《我的 ID 是江南美人》
《我的 ID 是江南美人》改編自同名人氣漫畫，由「臉蛋天才」車銀優、林秀香主演。講述從小因為長相醜陋而受盡歧視嘅「姜美萊」（林秀香飾）整容後，喺大學度首次嚐到受人歡迎嘅滋味，仲重遇萬人迷中學同學「都慶錫」（車銀優飾），「都慶錫」認得「姜美萊」，一直保護佢，兩人譜出一段甜蜜嘅愛情。劇集播出時，一眾網民都認為林秀香同車銀優高度還原咗漫畫角色，劇集當時非常受歡迎。

Photo from JTBC

《藍色海洋的傳說》
《藍色海洋的傳說》以美人魚為題材，由李敏鎬、全智賢主演。講述天才騙子「許俊宰」（李敏鎬飾）喺西班牙偶然遇上美人魚「沈清」（全智賢飾），兩人展開一段奇妙嘅故事，後來「沈清」為愛離開大海，追隨「許俊宰」到首爾，然而兩人嘅愛情不止今生，還有前世。《藍色海洋的傳說》係全智賢產後復出嘅劇集，即使成為媽媽，身材依然保持得非常好，佢嘅美人魚造型實在係太靚啦～