傳馬國明向湯洛雯求婚成功！出年結婚 獲女友爸爸送半億豪宅作婚房

「荀盤」馬國明同湯洛雯今年6月先公佈戀情，但結婚傳聞不斷。今日又傳出馬國明向湯洛雯求婚成功，兩人將於出年結婚，更有指靚湯爸爸送價值半億豪宅畀女兒作嫁妝。

馬國明入行以嚟形象極佳，雖然今年46歲，比33歲湯洛雯大逾10年，但外界仍非常睇好呢pair情侶。

佢哋今年6月先公佈戀情，而馬國明亦為女友開Instagram，兩人不時喺IG互相留言互動放閃。

據知靚湯父母對馬明非常滿意，佢哋又不時被拍得一齊睇車、睇樓。雖然公開戀愛僅4個月，但多次傳出婚訊。

今日再度傳出馬國明向湯洛雯求婚成功嘅消息，兩人出年就會結婚。

有指靚湯爸爸更送價值半億豪宅畀女兒作嫁妝，呢套位於馬鞍山逾2,000呎嘅別墅原本買入計劃係湯家自住，現時打算留畀靚湯結婚後做婚房。

馬明同靚湯雖然一直否認婚訊，但就講過結婚計劃，視彼此為結婚對象。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）