韓娛圈業界人士票選「2020 最佳及最差韓劇」 《機智醫生生活》奪最佳第一 呢部最差！
韓媒 Joynews24 早前對「2020 年最佳電視劇」及「2020 年最差電視劇」進行問卷調查，參與調查嘅對象包括娛樂公司、電視台、電影製作者、經紀公司等業內人士 200 人。到底邊幾部韓劇被評為最佳，邊幾部得到差評呢？
2020 年最佳電視劇
第一位：《機智醫生生活》（《슬기로운 의사생활》）（ 70 票）
《機智醫生生活》口碑非常好，深受觀眾喜愛，喺 2020 年上半年韓劇收視排名第六，今次仲奪得業界人士票選第一，可見受歡迎程度之高。目前劇集正準備拍攝第二季，相信又會掀起一股熱潮。
《機智醫生生活》由曹政奭、柳演錫、鄭敬淏、金大明及田美都主演，講述 5 位相識 20 年嘅醫生之間嘅友情，同埋喺醫院發生嘅溫馨故事。
Photo from tvN
第二位：《夫婦的世界》（《부부의 세계》）（ 60 票）
《夫婦的世界》絕對係 2020 年大熱韓劇之一，雖然劇情狗血，不過情節峰迴路轉，令人一直追看，人氣爆燈。喺 2020 年上半年韓劇收視奪得第二位嘅佳績，今次業界人士票選同樣獲得第二！
《夫婦的世界》由金喜愛、朴海俊及韓素希主演。故事講述「池善雨」（金喜愛 飾）發現丈夫「李泰伍」（朴海俊 飾）同「呂多景」（韓素希 飾）出軌，因此同丈夫反目成仇並決定報復。
Photo from JTBC
另外，朱智勛、柳承龍及裴斗娜主演嘅《屍戰朝鮮 2》、曹承佑、裴斗娜主演嘅《秘密森林 2》、玄彬、孫藝真主演嘅《愛的迫降》、金秀賢、徐睿知主演嘅《雖然是精神病但沒關係》及朴敘俊、金多美主演嘅《梨泰院 Class》都榜上有名。
Photo from tvN
Photo from JTBC
2020 年最差電視劇
第一位：《The King：永遠的君主》（《더 킹：영원의 군주》）（ 46 票）
《The King：永遠的君主》播出前話題度非常高，因為係李敏鎬退伍後首部作品，而且又係「金牌編劇」金銀淑嘅作品，佢寫過無數大熱韓劇如《太陽的後裔》、《鬼怪》等。可惜播出後韓國網民認為劇情過於複雜，李敏鎬同金高銀冇 CP 感，成績未如理想。
《The King：永遠的君主》由李敏鎬、金高銀主演，故事講述平行時空之門被打開，兩個世界有咗交集，大韓帝國皇帝「李袞」（李敏鎬 飾）偶然之下穿越到大韓民國，遇上刑警「鄭太乙」（金高銀 飾），兩人展開一段愛情故事並聯手對抗大反派。
Photo from SBS
第二位：《便利店新星》（《편의점 샛별이》）（ 30 票）
《便利店新星》同樣喺播出前話題度好高，可惜播出後被指煽情而受到爭議，加上劇情過於生活化而冇咩討論度，最後平均收視率 6.34% 更係創下咗 SBS 該時段歷來電視劇最低紀錄。
《便利店新星》由池昌旭、金裕貞主演，故事以便利店為背景，講述善良嘅「惡女」兼職「丁新星」（金裕貞 飾）同暖男店長「崔大賢」（池昌旭 飾）之間嘅愛情故事。
Photo from SBS
此外，金明洙、辛睿恩主演嘅《快過來》、丁海寅、蔡秀彬主演嘅《一半的一半》及金泰希、李奎炯主演嘅《Hi Bye, Mama!》都被票選為「2020 年最差電視劇」。
Photo from tvN
Photo from 《Hi Bye, Mama!》
唔知大家有冇睇過呢幾部韓劇呢？覺得如何啊？
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
