韓國狗血劇《Penthouse》　變態版《Sky Castle》有齊婚外情、家暴、賄賂！

韓劇《Penthouse》堪稱變態版《Sky Castle》，集所有狗血劇情於一身，自開播以來收視高企，被稱為「Sky Castle 2.0」及「夫婦的世界 3.0」！

《Penthouse》由柳真、金素妍、李智雅、嚴基俊等主演，出自韓劇《皇后的品格》金順玉編劇之手，集所有狗血劇情於一身，婚外情、家暴及賄賂等有齊晒。

Photo from SBS

《Penthouse》以韓國上流社會為背景，講述一群住喺韓國 Top 1% 上流人士先住到嘅「赫拉宮殿」嘅人嘅故事，住嘅樓層越高，權力同地位就越高。當中眾人勾心鬥角、同鄰居出軌、家暴，仲精彩過《夫婦的世界》。

Photo from 《Penthouse》

劇集當中有三個主要角色，分別係著名女高音「千書真」（金素妍 飾）、財閥家庭出身嘅「沈秀蓮」（李智雅 飾）及平凡嘅單親媽媽「吳允熙」（柳真 飾）。

「千書真」係韓國著名女高音，出身富裕家庭，婚後夫妻感情唔好，於是佢就同「沈秀蓮」嘅老公「朱丹泰」（嚴基俊 飾）偷情，呢個「朱丹泰」都係一個狠角色，係站喺金字塔頂端嘅男人，控制欲超強，仲對兒女家暴。

Photo from SBS

Photo from 《Penthouse》

「沈秀蓮」出身於財閥家庭，溫柔善良，雖然有私生女，不過都盡心盡力照顧丈夫前妻生下嘅雙胞胎，做好妻子及母親嘅角色。劇集一開頭佢就目睹家庭教師「閔雪雅」（趙秀敏 飾）墮樓，後來先發現原來佢就係自己嘅私生女，一直以來喺醫院接受治療嘅「私生女」原來只係丈夫「朱丹泰」調包而來。

Photo from SBS

Photo from 《Penthouse》

「吳允熙」係一個平凡嘅單親媽媽，讀書時期係實力優秀嘅女高音，係「千書真」嘅死對頭，但係「千書真」憑自己雄厚嘅家世，喺比賽度贏咗「吳允熙」。後來「吳允熙」放棄聲樂，獨自養育女兒，點知女兒同自己一樣熱愛聲樂，「吳允熙」更因此重遇「千書真」，向佢宣戰。

Photo from SBS

Photo from 《Penthouse》

劇集首播就創下 10% 嘅高收視，話題度極高！鍾意狗血劇嘅朋友千萬唔好錯過！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）