【11月電影推薦2020】《鬼滅之刃》外　精選4套不能錯過新戲！

近排個個都話等緊《鬼滅之刃》上映，但其實呢個星期仲有其他新戲上映，包括《屠．姐上錯身》、《靚太軍樂團》同《親愛的房客》，幾套電影嘅類型都唔同，啱晒唔同喜好嘅影迷～

1.《鬼滅之刃》劇場版 無限列車篇

Photo from hkmovie6

呢部動畫紅到就算無睇過嘅人都知！目前《無限列車篇》已成為日本史上票房最高第5位，電影好大機會會打破宮崎駿《千與千尋》嘅紀錄，成為最賣座嘅電影！

Photo from hkmovie6

《無限列車篇》承接住動畫版嘅結尾：炭治郎一行人喺蝴蝶屋訓練同休養完後，就接下新任務，佢哋需要喺無限列車上搵出潛伏喺列車嘅鬼，拯救車上嘅乘客。

2.《屠．姐上錯身》（FREAKY）

Photo from hkmovie6

《屠．姐上錯身》係一部恐怖喜劇電影，由《死亡無限LOOP》嘅 Christopher B. Landon 執導。

Photo from hkmovie6

故事講述一個殺人狂意外同一個女高中生 Millie （Kathryn Newton 飾）交換咗身體，如果 24 小時內 Millie 返唔到自己肉身嘅話就要成世做一個臭晒朵嘅殺人犯！最後 Millie 發現殺人狂竟然借佢身體去扮靚做萬人迷，仲諗住喺學校舞會大開殺戒！

3.《靚太軍樂團》（Military Wives）

Photo from hkmovie6

《靚太軍樂團》由真人真事改編而成，故事圍繞著一班太太，佢哋嘅丈夫同為駐守阿富汗嘅英軍，而佢哋為咗解悶同避免過份擔心丈夫安危，所以就決定組成合唱團，用歌聲去表達出對丈夫嘅思念。雖然呢班靚太無學過唱歌，但係佢哋最後都成功登上大舞台表現，亦令佢哋更加團結。

Photo from hkmovie6

由於電影同合唱團有關，當然少不免有好歌聽！一班靚太除咗會翻唱80年代嘅經典歌曲，如「Don’t You Want Me」、「Only You」等，仲會有超感人嘅原創歌曲「Home Thoughts From Abroad」。

4.《親愛的房客》

Photo from hkmovie6

《親愛的房客》係一部探討同志、死亡、收養議題嘅台灣電影，佢喺今屆金馬獎中獲得6項提名，而莫子儀更憑住「林健一」一角榮獲台北電影節最佳男主角。

Photo from hkmovie6

電影講述林健一 （莫子儀 飾）無條件照顧年邁、患有糖尿病嘅房東周秀玉（陳淑芳 飾）同一個 9 歲嘅男仔王悠宇 （白潤音 飾）。當周秀玉過世後，王悠宇嘅叔叔立綱 （是元介 飾）返嚟奔喪先發現間屋已經轉成林健一個名，而林健一亦收養埋王悠宇，令到立綱不禁對林健一起疑心。

4部電影都將於11月12日上映，有興趣嘅朋友唔好錯過啦～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）