韓國首位AI人工智能主播登場！可24小時工作 與真人相似度極高難分真假！

時代變化、科技日新月異。近年AI人工智能技術越嚟越普及，就連女團成員都有AI角色。近日韓國電視台就推出首位AI人工智能女主播，引起熱議。因為AI主播同真人幾乎無分別，只從外表睇根本分辨唔出。

韓國娛樂公司SM近日就推出新女團「aespa」，當中4位成員都各有一個AI人工智能角色，但AI同真人仍然有好大嘅差異。

韓國收費電視台MBN最近亦有一位AI人工智能主播，引起大眾熱議。雖然同為AI，但呢個AI主播明顯比女團aespa嘅AI偶像更令人震驚。

AI主播係以電視台新聞女主播金柱夏（김주하）為原型，同樣取名為「金柱夏（김주하）」，AI金柱夏報導新聞過後，即引發討論，因為AI同真人金柱夏太過相似，甚至可以話係一模一樣！

兩者只睇外貌根本分辨唔出邊個係真人，邊個係AI。朗讀新聞稿方面，AI雖然感情仍有不足，但發音、語氣都同真人差唔多。

AI主播金柱夏（김주하）：

真人主播金柱夏（김주하）：

AI金柱夏係整合咗真人金柱夏嘅外貌、動作同聲音後誕生，最快可以喺1分鐘內快速生成1千個字報道。

AI主播由MBN同人工智能開發公司共同研發，可以24小時唔休息，無間斷工作。希望發生災難時，AI主播快可以快速報導突發新聞，而且AI主播仲可以節省人力、時間同成本製作新節目。

對於AI主播，真人金柱夏表示擔心AI技術有一日會威脅到佢嘅地位：「我會盡力傳達AI暫時無法畀到人嘅溫暖感覺。」

AI金柱夏報導新聞片段：

資料來源：매일경제

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）