download HolidaySmart 假期日常 app
《使徒行者3》硬膠位盡現 細數歷來TVB劇集誇張劇情

《使徒行者3》硬膠位盡現 細數歷來TVB劇集誇張劇情

生活熱話 電視電影 娛樂新聞
By Charlie on 13 Nov 2020
Digital Content Writer

TVB台慶劇《使徒行者3》成網民討論熱話,除咗有林峯回巢再次飾演「爆seed」一角外,入面嘅硬膠劇情都引嚟唔少網民恥笑。一齊睇下到底呢套劇有咩膠位!


第一集《使徒行者3》中,「爆seed」經歷完撞車、爆炸之後都完全無事,仲好型咁企返起身,猶如有不死身咁,主角光環果然強勁!

去到兩日前播映嘅第三集,「爆seed」同「阿兜」(蔡思貝 飾)被困雪房,「阿兜」就喺入面搵到把手術刀,跟著「爆seed」就爆seed,開始用把刀鋸鐵管,希望整斷入面嘅電線,睇下可唔可以打開門,最後就真係畀佢哋成功走得甩~

其實近年 TVB 劇集都有唔少誇張、唔合理嘅劇情出現,仲有唔少穿崩鏡頭,所以好多網民都覺得佢哋嘅製作好求其同是但。

《隔世追兇》

每過幾年,石修嘅獨門「催眠大法」就會有網民拎返出嚟鞭屍!石修畀「阿光」用槍指住,然後石修就話:「我當時好危險,生命受到威脅,於是我停落嚟,我望住佢,我咁同佢講,你流緊血喎,你睇地下,一滴,二滴,三滴,就係咁,我催眠咗佢……」唔知電視機前嘅觀眾有無被催眠到呢?

Photo from 《隔世追兇》

輕鬆催眠咗佢~Photo from 《隔世追兇》

《神鎗狙擊》

講套劇名大家可能未必有印象,但相信大家都會對謝天華邊攀岩邊傾電話嘅一幕好有印象!而謝天華仲要汗都無滴,表示輕鬆~唔少網民都表示呢幕真係太假,仲話謝天華「勁過超人」。

呢部劇仲有個經典膠位,就係徐子珊嘅「不死身」!佢飾演嘅「阿珠」經歷完幾次嘅近距離爆炸同猛烈嘅槍擊後都可以唔死,仲要喺幾層高嘅大廈跳落嚟可以完美著陸,真係好犀利!最好笑係,「阿珠」竟然用辦公檯去擋咗咁耐子彈,真係好想問張檯邊到有得買!

《桌球天王》

Photo from 《桌球天王》

由鄭少秋、郭政鴻等人主演嘅《桌球天王》都係膠劇嘅經典!除咗「倚天cue」同「屠龍Cue」會打出火燄同龍捲風外,啲招式仲要違反晒物理學,所以網民都不禁恥笑呢部劇其實叫「功夫桌球」。

笑死 勁唔make sensePhoto from 《桌球天王》

督波督到打晒筋斗咁係咩事Photo from 《桌球天王》

廣告
廣告

《戀愛自由式》

講到《桌球天王》就不得不提都係以運動為主題嘅《戀愛自由式》!入面嘅泳手除咗可以使出無啦啦彈上水飛到勁遠(片石轉身)外,仲可以使出絕技「super破冰轉身」,勁到你唔信!

《叛逃》

關禮傑信心滿滿Photo from 《叛逃》

喺第 5 集入面,關禮傑飾演嘅教官「沈志敖」向反恐組學員示範跳躍特訓,跟著佢就以極誇張嘅CG效果成功「跳」到對面樓,而陳展鵬飾演嘅「莊有正」睇完示範之後都成功,睇嚟兩位腿力都相當驚人!

Photo from 《叛逃》

《飛虎2》

呢部劇集又係超多膠位!梁競徽除咗可以透過番梘泡反射嘅倒影望穿敵人嘅位置,最神奇嘅係佢竟然可以用 .38 手槍遠距離咁射中對面大廈嘅敵人。

呢個狙擊手都幾勁!Photo from 《飛虎2》

Photo from 《飛虎2》

另外,《飛虎2》嘅「計時炸彈」又係打破晒觀眾對炸彈嘅概念!本來以為拆彈係需要剪線,但原來撳粒掣就可以整熄個炸彈,就好似鬧鐘咁,真係好誇張!

拆彈專家:「Am I a joke to you?」Photo from 《飛虎2》

《黃金有罪》

今年播映嘅《黃金有罪》都有膠位,姚子羚喺畀車撞後身亡,本身應該係好淒美嘅劇情,但因為誇張嘅CG技術,令到姚子羚畀車撞後凌空飛到勁遠,同《夜市人生》經典撞車橋段有得揮!網民紛紛笑稱「明明係催淚位,竟然變咗做笑位!」

其實 TVB 劇集仲有好多穿崩位,如 C Drive上網大法、Windows Media Player充當驗證程式等,數極都仲有!不過其實得閒睇返都真係幾好笑~

C Drive都可以上網Photo from HK Galden

 

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel