病情穩定有好轉！余慕蓮氣管造口手術成功　獲准離開深切治療部

83 歲嘅余慕蓮（魚毛姐）早前因為患罕有病症血液炎（屬血癌一種）以及肺纖維化，入住伊利沙伯醫院深切治療部。當時曾喺入院前一度向好友留語音道別，指如果唔醒就下世再見嘅魚毛姐，日前就有消息指佢已成功拔喉並完成氣管造口手術，離開深切治療部休養。

消息指，余慕蓮目前情況穩定，並喺星期一時已完成頸部氣管造口手術，順利拔喉。

而消息中亦指魚毛姐尋日已獲醫生批准由深切治療部（ICU）轉至加護病房休養。

有 TVB 綠葉王嘅余慕蓮，喺今年 7 月接受電視訪問時，曾表示因聘請嘅工人姐姐離職，而變回獨居老人，幸好當時獲唔少朋友幫忙照顧三餐。

余慕蓮當時又指有醫生唔收佢醫藥費，因為知道佢平時有做義工同捐錢起學校。不過佢就澄清自己有積蓄，可以照顧到自己。

其實獨身一人嘅余慕蓮多年嚟熱心公益，為唔少山區兒童捐錢、起學校，係知名嘅慈善家嚟。而佢更曾表示離世後會捐出所有財產嘅心願。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）