馬德鐘父子首度合體拍劇！馬在驤演馬德鐘年輕版！馬神大讚仔仔演戲自然

馬德鐘馬在驤餅印父子一齊出演TVB新劇《我家無難事》，馬在驤飾演爸爸年青版，爸爸馬德鐘指聽導演講，仔仔嘅演出都好自然。其實馬在驤之前已經表明唔抗拒演戲，更表示想挑戰做奸角！

馬德鐘（馬神）21歲仔仔馬在驤之前簽約邵氏兄弟為加入娛樂圈作準備，更同爸爸拍檔合體拍廣告。

當時馬在驤已經表明唔抗拒演戲，更表示想挑戰做奸角！估唔到佢哋真係合作做TVB新劇《我家無難事》～

同劇仲有好耐無拍劇嘅車婉婉同鮑起靜，而馬在驤就飾演爸爸馬德鐘角色嘅年輕版。

問到對仔仔表現有咩評價，馬神就話未睇過仔仔嘅演出，但聽佢同導演講，表現都ok，馬神又指個角色唔需要好大嘅發揮，相信仔仔都會演得幾自然。

新劇試造型時，馬在驤就話會同爸爸喺屋企研究下點做個角色，更即場同爸爸表演「神同步」做同一個表情。

不過今次新劇兩父子並無對手戲，馬在驤就指如果爸爸在場一定會有好大壓力！而唐詩詠就話可以同到兩位「馬神」合作超開心～

即睇片：

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）