佘詩曼《燕雲台》將接棒《使徒3》TVB黃金時段開播　三大必睇位望打破《延禧》收視

早前「視后」佘詩曼因喺大陸熱播古裝劇《燕雲台》中嘅一場喊戲，其眼淚留喺眼眶中勁有感染力，更獲封為「教科書級神演技」！而嚟緊大家仲可以睇到佢喺劇中嘅神級演技喇，事關嚟緊依套劇將會接棒《使徒3》喺 TVB 嘅黃金時段（20:30-21:30）播出呀！

《燕雲台》係一套以以「大女主」題材嘅作品，整個故事係根據史實改篇嘅，主要圍繞遼國時期嘅三姐妹蕭燕燕（唐嫣飾）﹑蕭胡輦（佘詩曼飾）﹑蕭烏骨里（盧杉飾）身上。原本三姐妹感情要好，但因為三人所嫁嘅丈夫都係皇族之人，佢哋為咗一個「皇位」而互相猜測勢要成為一國之君。而三位女主角就為咗自己丈夫嘅利益慢慢姐妹情變，其中以蕭燕燕最為厲害成為大贏家。

而除咗故事吸引之外，劇集喺製作上亦相當認真。劇中演員嘅服飾大多以金﹑銀飾為主，呈現遼國當時社會金銀器嘅發展。劇中更清楚交代咗遼國當時貴族男女都要頭戴冠飾，突出身份地位同奴隸嘅分別。

而劇組為咗更了解當時遼國嘅歷史文化，特別請嚟對遼國有歷史研究嘅專業人士作現場指導，細緻到演員雙手交叉碰雙肩嘅動作、結婚以及遊牧民族的性質，都一一呈現，製作相當認真。

當然唔少得 cast 陣容喇！

飾演女配角佘詩曼累積多年嘅演戲經驗，演技就幾好就唔使講喇！

而飾演女主角嘅唐嫣就畢業於中央戲劇學院，喺演戲方面受過專業訓練。再加上同為北京電影學院畢業男主角竇驍﹑男配角經超，可以話係清一色實力派嘅人氣演員。

《燕雲台》係佘詩曼相隔兩年後再有古裝劇喺 TVB 播出，唔知到時收視會唔會突破當年《延禧攻略》呢？！

《燕雲台》將於 12 月 28 日喺 TVB 接力劇集《使徒行者3》喺翡翠台黃金時段（20:30-21:30）播出，想睇「視后」佘詩曼嘅神級演技就唔好錯過喇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）