download HolidaySmart 假期日常 app
【麥玲玲2021生肖運程】率先預測牛年12生肖運程:牛、虎、兔

【麥玲玲2021生肖運程】率先預測牛年12生肖運程:牛、虎、兔

生活熱話
By Celia on 03 Dec 2020
Digital Editor

仲有兩個幾月鼠年就過去喇~想知出年牛年嘅運程係點?今年再次搵嚟著名玄學家麥玲玲師傅話畀大家點每個生肖有咩要注意嘅事,等大家可以有時間做足準備。唔講咁多,就由出年本命年嘅牛牛開始講喇~

著名玄學家麥玲玲師傅

牛:

本命年+犯太歲
吉星:華蓋、歲駕
凶星:劍鋒、伏屍

屬牛嘅朋友,嚟到牛年就犯本命年,犯本命年係犯太歲嘅一種。Photo from shutterstock

屬牛嘅朋友,嚟到牛年就犯本命年,犯本命年係犯太歲嘅一種。中國人話最好 「一喜擋三災 無喜是非來」、「太歲當頭坐 無喜必有禍」, 犯太歲嘅年份,最好以傳統嘅大喜事作為沖喜,結婚、添丁、買樓...都係唔錯嘅選擇嚟嘅。

但要結婚嘅朋友都要諗清楚,因為當中嘅過程,可能都會有啲嘅拗撬,反而就會一波三折,所以今年記得包容同忍讓。

今年有「華蓋」星 ,「華蓋」星本身係代表藝術才華嘅星,同埋歲駕星都係藝事業有幫助嘅,特別係如果你係從事一啲同靈感創作有關嘅嘢,今年就相當唔錯喇!

要小心就係身體健康方面,因為今年有「劍鋒」星,「劍鋒」代表容易受金屬傷,所以就唔建議今年做任何比較危險嘅戶外活動。過年之後捐吓血、洗吓牙 ,係唔錯嘅選擇嚟,同埋最好就係戴一個老鼠嘅飾物,就自然平平安安!

虎:

吉星:天乙貴人、紅鸞、太陽、天空
凶星:晦氣、孤辰

嚟到牛年,你係數一數二咁好,今年有天乙貴人星、紅鸞星、太陽星、仲有天空星添!

屬老虎嘅朋友恭喜你呀!嚟到牛年,你係數一數二咁好,今年有天乙貴人星、紅鸞星、太陽星、仲有天空星添!天乙係一個強而有力嘅貴人,而紅鸞本身故名思義代表住桃花,所以今年係特別受人歡迎。

太陽依個星係代表男性貴人,如果你做嘅生意係同男士有關,例如:汽車、音響、模型...以男性顧客為主,今年財運相當之唔錯。單身嘅老虎女,今年可以把握一下機會。但要小心嘅就係結咗婚嘅朋友,今年桃花比較旺,千祈唔好對人太熱情,好容易引發三角關係㗎!

另外今年有晦氣同孤辰星,兩個星都係代表住同人溝通不足,今年要留心人際關係方面,好好同人相處,就自然運氣好㗎喇!


在 Instagram 查看這則貼文

E臣(@mreasonchan)分享的貼文

兔:

凶星:喪門、災煞、披頭

喺依個年份入面,如果無吉星照,我哋唯有多啲走動,靠自己喇!

屬兔嘅朋友,嚟到牛年原則上係無沖無合,今年係比較平穩,但由於今年並無吉星照住,傳統上無吉星照,就會借對宮嘅星過嚟,借到屬雞嘅星過嚟,有天解星、將星同埋祿勳星。天解係解決困難嘅星,屬半吉半凶,所以今年係會先難後易。

另外將星係領導才能嘅星,祿勳代表住升職加薪,事業上都會有少少嘅副助,但借過嚟嘅星得三成嘅力量,所以唔好期望過高。

但凶星方面就有喪門星、災煞星及披頭星,留心家宅運入面,老人家嘅身體健康,今年喺屋企上會比較多少少麻煩嘢,最好就係裝修吓屋企又或者換吓傢俬,對屬兔嘅朋友嚟講都係好嘅。喺依個年份入面,如果無吉星照,我哋唯有多啲走動,靠自己喇!咁今年就係一個先難後易嘅年份嚟㗎~

今次講住頭3個生肖先,下次繼續!

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel