12 月必睇 4 套韓劇推介　青春愛情、浪漫驚悚、穿越喜劇都有！

2020 年韓劇有好多話題之作，好似《夫婦的世界》、《Alice》等，到咗 12 月依然都有好多好劇畀大家睇，今次推介 4 套 12 月必追韓劇，由青春愛情到浪漫驚悚都有！

《日與夜》11 月 30 日首播
《日與夜》由收視王牌南宮珉、金雪炫及李清娥主演，係一部刑偵劇集之餘仲涉及超自然題材，三位主角聯手合作打開 28 年前嘅潘朵拉盒子。故事講述多年前透過實驗而獲得超越人類極限智慧，但失去感情嘅孩子們，因為一件神秘事件而重遇。首爾地方警察廳特搜組組長「都正宇」（南宮珉 飾）、FBI 精英調查員「Jamie」（李清娥 飾）同女警「孔惠媛」（金雪炫 飾）奉命調查，卻意外發現與 28 年前某村莊發生嘅神秘事件有關，揭開驚人秘密。《日與夜》已於 11 月 30 日起登陸「黃Viu煲劇平台」。

早前南宮珉喺發佈會上提及，比起收視壓力，佢更看重劇本，給予劇本高度肯定，表示睇到劇本時覺得同以往嘅推理劇唔同，係過去從未有過嘅題材。

《出軌的話就死定了》12 月 2 日首播
《出軌的話就死定了》由曹汝貞及高俊主演，係一部浪漫驚悚劇。故事講述專門幫客戶寫「敢出軌就死定了」保證書嘅離婚專業律師「韓宇成」（高俊 飾）同暢銷推理小說家「姜汝珠」（曹汝貞 飾）簽訂婚約及「放棄身體契約書」，如果出軌嘅話，身體所有權將轉讓畀妻子。《出軌的話就死定了》於 12 月 2 日首播，同日深夜登陸「黃 Viu」。

《出軌的話就死定了》由奧斯卡最佳電影《上流寄生族》中飾演闊太嘅曹汝貞主演，搭檔出演過《熱血司祭》嘅高俊，非常期待兩人擦出嘅火花。

《女神降臨》12 月 9 日首播
《女神降臨》被譽為「下半年最令人期待的劇集」，改編自韓國同名漫畫，漫畫本身已經擁有超高人氣，一推出，短時間內已經登上 Webtoon 冠軍寶座。劇集由選角開始就備受關注，未播先紅！《女神降臨》將於 12 月 9 日起登陸「黃Viu煲劇平台」。

《女神降臨》由韓國「臉蛋天才」車銀優、文佳煐及黃仁燁主演，係一部青春愛情劇。故事講述對外貌感到自卑嘅「任朱靜」（文佳煐 飾）透過整容級化妝術成為女神後，周旋於外型出眾嘅「李修豪」（車銀優 飾）及「韓書竣」（黃仁燁 飾）之間，展開三角關係。

《哲仁王后》12 月 12 日首播
《哲仁王后》由申惠善及金正賢主演，係一部穿越喜劇。故事講述生活喺現代嘅青瓦台主廚「張奉煥」（崔振赫 飾）意外穿越到朝鮮王宮，靈魂仲被困喺王后「金素容」（申惠善 飾）身體內，令原本端莊優雅嘅王后變得麻甩，仲同「哲宗」（金正賢 飾）發生連串笑料。《哲仁王后》將於 12 月 12 日深夜登陸「黃 Viu 煲劇平台」。

申惠善過去一直都係飾演一啲優雅嘅角色，好似小提琴家、芭蕾舞者等，今次首度出演穿越喜劇，仲要變成「麻甩」皇后，令佢大呼過癮，仲表示感覺好新鮮，同以往演過嘅角色唔同，可以展示到自己另一個面貌。鍾意睇喜劇嘅朋友千萬唔好錯過啦！

有咁多歐巴陪住過聖誕，今個聖誕一定好溫暖～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）