柯震東豪宅公開　自稱「爸寶」收藏 1:1 Marvel、DC 玩具

By Ella on 07 Dec 2020

Digital Content Writer

柯震東近年影視作品大減，不過依然活躍於社交平台，早前更開設 YouTube 頻道開箱自己嘅豪宅，成間屋非常整齊，就好似陳列單位咁，而且仲收藏咗超多玩具、畫作，連 1:1 Marvel、DC 玩具都有！

柯震東最近開設自己嘅 YouTube 頻道「柯震東 Kai Ko」，拍片公開自己位於台北嘅豪宅。由玄關開始，已經充滿藝術氣息，有柯爸爸收藏嘅畫作做裝飾，仲有老馬鞍做凳畀客人坐低除鞋，淨係玄關都已經非常講究，另外玄關度仲加多咗一道門，柯震東笑言相信有睇週刊、新聞嘅人都知我屋企喺邊，所以加多道門安全啲。

Photo from kaikaiko@IG

Photo from 柯震東 Kai Ko@YouTube

入到客廳就可以見到一個掛有畫作嘅小角落，呢個又係柯爸爸嘅收藏品之一。而客廳最吸睛嘅相信就係巨型屏幕，簡直就係私人影院。另外廚房飯廳都非常整潔，更有柯爸爸自己製作嘅木枱，可見柯爸爸對間屋嘅設計非常用心，柯震東都搞笑話：「我甚麼都講我爸，好像感覺我是『爸寶』，但沒錯我就是『爸寶』！」其實係因為柯爸爸對間屋嘅裝修非常有強烈嘅意見同要求，所以柯震東就只係同爸爸講自己想要啲咩，其他就交畀爸爸自由發揮。

Photo from 柯震東 Kai Ko@YouTube

最搞笑嘅係，當攝影師提及個雪櫃有得自己出冰塊同冰水嘅時候，柯震東竟然話：「這個不是一個很正常的事情嗎？」後來柯震東發現自己失言，大笑打圓場。

Photo from 柯震東 Kai Ko@YouTube

豪宅入面仲有客房，就連客房嘅裝修都毫不馬虎，有衣帽間之外，廁所更有雙人洗手盤，有馬桶之餘，仲有洗屁股嘅設施！貧窮真係限制咗人嘅想像⋯⋯

Photo from 柯震東 Kai Ko@YouTube

介紹完客房就到柯震東嘅房間，房間裝修非常簡單，而且好整潔，仲有一個小角落可以坐喺度休息。雖然房間裝修簡單，不過重頭戲係喺廁所，廁所大過間房之外仲連住衣帽間，有浴缸之餘仲有埋淋浴間。

Photo from 柯震東 Kai Ko@YouTube

到咗成間屋嘅重頭戲就係玩具間！柯震東收藏咗好多玩具，更有 1:1 嘅 Marvel、DC 玩具！除咗呢啲大型收藏，仲有其他收藏品好似「Iron Man」送畀「Spider Man」嘅眼鏡及「無限手套」，而 1:1 嘅小丑公仔仲係柯震東自己搵設計師設計。相信擁有呢間玩具間應該係 Marvel 迷同 DC 迷嘅夢想～而柯震東都自爆自己花咗超過台幣 200 萬（約港幣 55 萬）去收藏呢啲玩具！