國際雜誌嚴選 2020 年 10 大最佳遊戲排名！冠軍獲一致好評　Among Us/動森三甲不入

話咁快就 12 月喇！嚟到 2020 年嘅最後一個月，唔少人都紛紛為今年作總結，而當然遊戲都唔例外喇！早前國際雜誌《Time》就公布咗 10 大最佳遊戲排行榜，唔少人氣大熱 game 都有上榜，如：《集合啦！動物森友會》、《Fall Guys》、《Among Us》，但遍遍都唔夠依隻 game 嚟！！

即刻睇吓今年最佳遊戲排行啦！

第10位：《Tony Hawk’s Pro Skater 1+2》（Tony Hawk 滑板高手1+2）

《Tony Hawk 滑板高手1+2》係 1999、2000 年推出嘅經典滑板遊戲重製版嚟，畫面除咗經過大翻新外，仲提供咗 4K 超高解析度畫質，及加入「創造滑板場地」與「創造滑板選手」模式，令遊戲更多變。

第9位：《Fall Guys: Ultimate Knockout》（糖豆人：終極淘汰賽）

Fall Guys 今年一推出已掀起打機熱潮，遊戲以 60 人大亂鬥為主，玩家必須完成每個關卡任務，成為最後嬴家。早前仲推出咗魔幻風嘅中世紀主題，加入唔少得意嘅服裝/造型。

第8位：《Microsoft Flight Simulator》

以模擬飛機駕駛為主題，飛越美國多個大城市，包括紐約、聖地牙哥以及波士頓等熱門旅遊勝地，畀大家邊模擬揸飛機邊欣賞各地景色。啱晒依家因為疫情而冇得去旅行嘅大家～

第7位：《Call of Duty： Warzone》（決勝時刻：現代戰域）

《決勝時刻：現代戰域》係一隻免費嘅大逃殺遊戲嚟，可以一次允許過百名線上玩家進行戰鬥，有大逃殺及奪金之王兩種模式，唔同嘅模式啱晒唔同嘅玩家！

第6位：《Ori and the Will of the Wisps》

《Ori and the Will of the Wisps》係一隻動作冒險類遊戲嚟，遊戲畫面優美且風格治癒。故事以小精靈奧里踏上尋找小黑嘅旅程為主，遊戲中玩家要征服強大嘅敵人，解開極具挑戰性嘅難題。

第5位：《集合啦！動物森友會》

講起動森，大家一定唔會陌生，推出時更掀起全城打機熱潮。遊戲以無人島作為遊戲背景，玩家喺島上冒險收集素材，製造家具及邀集動物作鄰居，唔同嘅季節及節日仲會推出限定活動添！

第4位：《Among Us》

早前大熱嘅太空狼人殺遊戲《Among Us》，遊戲分為好人陣形及壞人陣形，要勝出就要完成各自嘅勝利條件，啱晒同朋友就算冇得見都可以喺線上鬥智鬥力嘅遊戲。

第3位：《The Last of Us Part II》

Playstation 超人氣遊戲續作，故事劇情延續上一集內容，不過喺遊戲開售後獲得唔少好評，但喺真實玩家嘅評語中卻有唔少負評，到底好唔好玩就要睇你點睇喇！

第2位：《Spider-Man: Miles Morales》

依隻 game 係 2018 年《Spider-Man》嘅續作，遊戲以新一代蜘蛛俠 Miles Morales 為主角，講述強勢嘅新能源供應商「洛桑能源公司」與使用高科技武裝嘅幫派「地下幫」嘅鬥爭日益激化，Miles 須防止紐約再次陷入危機。

第1位：《Hades》

第一位就係《Hades》依隻喺 Steam 平台獲得一致好評嘅遊戲，遊戲以希臘神話中冥王黑帝斯嘅仔「札格列歐斯」為主角，佢想要逃離冥府但受盡阻撓。《Hades》自推出以嚟被大讚打鬥動作流暢，劇情與系統相互運用，而且手繪風格亦成為特色之。

唔知大家又玩過邊幾隻呢？

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）