【Google 10大熱搜電影 2020】人氣動畫《鬼滅之刃》唔係第一？港產片《幻愛》/《麥路人》三甲不入！

話咁快 2020 年已經嚟到最後一個月，而喺每年嘅年尾都會係每個項目嘅總結，早前 Google 就公布咗各地今年唔同類別嘅搜尋關鍵字，而當年就包括咗電影類別。雖然今年因為疫情關係，除咗令唔少時間都冇得去戲院睇戲嘅同時，仲令唔少電影大作延期或取消喺戲院上映，如 Marvel 嘅《黑寡婦》、DC 嘅《神奇女俠 1984》、《007 No Time to Die》以及 Disney 嘅《花木蘭》等，而唯一成功上映嘅話題作《天能 TENET》喺熱搜榜中亦不負眾望排行榜首。

其中當然亦有港產片上榜喇！而且今年仲有 3 套動畫都榜上有名呀～

10. 《麥路人》

電影靈感取材於全球普遍社會嘅悲情實況，描繪一班因為各種原因集結喺 24 小時快餐店嘅人嘅辛酸故事，反映現今社會嘅貧富差距問題。

9. 《屍殺半島》

劇情延續《屍殺列車》嘅世界觀，講述喺喪屍災難發生嘅四年後，整個國家喪失其功能而被孤立，朝鮮半島因為這場前所未有嘅災難而淪為廢墟，人們為咗逃離半島而展開最後嘅殊死搏鬥

8. 《整容液》

電影以諷刺韓國盛行嘅整容文化為題材，改編自奇幻漫畫《奇奇怪怪》中最受歡迎嘅同名系列，係韓國史上首部都市恐怖動畫。

7. 《花木蘭》

《花木蘭》由動畫翻拍成電影真人版，改編自中國民間傳說，描述一位名為花木蘭嘅女子代父從軍嘅巾幗英雄故事。

6. 《數碼暴龍 LAST EVOLUTION 絆》

《數碼寶貝 LAST EVOLUTION 絆》係一部延續《數碼寶貝》初代同二代嘅動畫嚟，今次嘅主角八神太一同石田大和都已經成為大學生，但因為發生人們因不明原因昏倒嘅事件，佢哋再一次與當年嘅搭檔數碼暴龍亞古獸及加布獸一起戰鬥。而今集亦可以話係對初代被選中細路嘅最終章嚟，唔少人都睇到喊呀！

5. 《乜代宗師》

《乜代宗師》係黃子華第二部自編自導自演嘅電影嚟，係繼《一蚊雞保鏢》後相繼 18 年佢自己投資嘅電影作品嚟。

4. 《幻愛》

《幻愛》一部香港愛情電影，上映一星期的已衝破400萬票房，當時唔少睇完戲嘅影迷都覺等唔夠喉，而紛紛搶購同名小說，令小說版喺推出 5 日就全數沽清再加印。

3. 《鬼滅之刃劇場版無限列車篇》

劇場版嘅故事將會承接第一季動畫蜘蛛山篇，講述家人慘遭鬼殺害的少年－竈門炭治郎等人完成「蝴蝶屋」嘅訓練後，抵達下一個任務地點「無限列車」。據說喺短時間之內，已有四十人以上嘅乘客喺列車上消失。

2. 《上流寄生族》

雖然依套戲係上年 6 月時上映嘅黑色幽默驚悚劇情片，但因為喺今年第 92 屆奧斯卡金像獎中成功打敗眾多對手，成為史上首部獲得奧斯卡獎最佳影片獎嘅外語電影嚟。

1. 《天能TENET》

《天能TENET》可以話係今年最燒腦嘅電影嚟，因為如果你只係睇一次，絕對唔會睇得明電影講咩，唔少人最少都要睇兩次或以上先理解到故事中嘅每個細節，難怪當時導演會同觀眾講：「don’t try to understand it, feel it」喇！

唔知大家嘅心水電影有冇上榜，又排第幾位呢？

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）