《女人俱樂部》M Club 7位少女演員近況！有人已為人妻/人母！

《女人俱樂部》近日於深夜重播，以韓國電影《陽光姐妹淘》為靈感，年青時回憶係賣點，電視劇由李若彤、李麗珍、袁潔瑩、陳慧珊、葉蘊儀、張慧儀及江欣燕主演，佢哋嘅少女時代亦有7位女演員飾演，事隔6年，呢7位女演員已從新人升呢，更有人已為人妻、人母！

《女人俱樂部》於2014年首播，最近喺深夜重播，7位資深女演員擔正當然令劇集關注度大升，但飾演佢哋少女版嘅新人依家都成長唔少，各有發展！

1. 陳瀅（飾演陳慧珊年青版）

《女人俱樂部》原來係佢喺TVB嘅第一套劇！佢喺劇中飾演高傲校花，之後為人熟悉，更接拍多套電視劇，包括《四個女仔三個BAR》、《跳躍生命線》、《降魔的2.0》等，佢2019年參演《福爾摩師奶》嘅演技獲不少讚賞。

2. 陳嘉寶（飾演李若彤年青版）

陳嘉寶自《女人俱樂部》後，2016年參演嘅《殭》都有好評，不過已經喺2019年離開TVB。

佢喺2017年與初戀男友結婚，依家已經喺兩女之母！兩個女分別係Hosanna、Eliana，一家四口相當幸福～

3. 賴慰玲（飾演張慧儀年青版）

賴慰玲經佢喺演藝嘅老師羅冠蘭推薦，參演《女人俱樂部》試鏡而加入演藝圈。試鏡時更一人分飾7角，最終獲選飾演「少女許珍妮」。佢其後出演《梟雄》時得影帝黃秋生賞識，演技亦備受網民認可，最近喺《反黑路人甲》「大小姐」蔣千霞一角演技大獲好評，獲大台力捧！

佢同舞台劇演員梁子峰拍拖多年，更同陳嘉寶同年同月同日入紙註冊結婚，現已為一子之母。

4. 王敏奕（飾演李麗珍年青版）

出演《女人俱樂部》後，2019年首次為ViuTV拍電視劇《理想國》、《假設性無罪》，佢喺2020年重返TVB，加入星夢娛樂出道做歌手。

佢同《女人俱樂部》監制嘅兒子曾國祥喺2019年結婚，佢哋拍拖6年終拉埋天窗！

5. 糖妹黃山怡（飾演葉蘊儀年青版）

雖然糖妹係歌手出道，但都參演過多套劇集，包括《幕後玩家》、《使徒行者2》等，依家播出嘅《香港愛情故事》佢都有份出演！

6. 吳嘉熙（飾演袁潔瑩年青版）

本身係組合Super Girls成員，佢甚少參與電視劇拍攝，《女人俱樂部》係佢第一套電視劇，之後只拍過ViuTV《Plan B》同香港電台嘅《手語隨想曲6》，近年已無再拍劇，2020年染咗金髮，推出咗同余香凝嘅合唱歌《天地分裂》。

7. 吳燕菁（飾演江欣燕年青版）

「A2A」雙胞胎組合成員，擅長多種舞蹈包括芭蕾舞、爵士舞、Hip-Hop等。佢拍完《女人俱樂部》之後就無再主演劇集，有上過大陸綜藝《加油！美少女》，近年已好少喺幕前見到佢。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）