日本東京首間芬蘭浴場SOLO SAUNA tune！靜靜一個人享受/同閏蜜包房Relax都OK～

提到芬蘭除咗聖誕老人同極光之外，唔少人去到當地一定會試吓嘅就係芬蘭浴，一般嚟講芬蘭浴設施係一大班一齊用嘅，如果想要自己一個靜靜哋獨享就可能要睇吓佢想嘅地方有冇提供喇！不過其實想體驗芬蘭浴又唔一定去到芬蘭咁遠嘅，喺日本最近新開嘅芬蘭浴場 SOLO SAUNA tune 就體驗到喇！

SOLO SAUNA tune 位於日本東京神樂坂，喺當地首間芬蘭浴場嚟，浴場為咗唔鍾意同陌生人共處嘅大家提供私隱嘅芬蘭浴而設嘅。

浴場由更衣、享受桑拿到冷水降溫，都可以喺獨立房間內完成。

而設備則全部由芬蘭進口，規格正宗。同一般高溫桑拿唔同，浴場內設定約 70℃ 並配合高濕度，令人唔會有難以呼吸嘅感覺，可循序漸進慢慢溫暖身體，促進排汗。

另外，亦可以選擇以白樺香嘅精油水灑喺桑拿爐上，散出水蒸氣令身體加速流汗水，放鬆心情。喺蒸完身後，仲可以躺喺長椅上，一邊聽住音樂一邊休息，享受一個人獨處嘅時光。

當然，如果你怕一個人悶嘅話，亦可以同最多三名同性朋友一齊使用三人房，同家人/朋友齊齊Relax！

至於價錢方面，獨立個室 1 小時普通票價為 3,800 円（約 HKD$281），三人房 1 小時普通票價為 11,400 円（約 HKD$849）。

下次來體驗芬蘭浴就唔一定要去咁遠喇～

SOLO SAUNA tune
地址：東京都新宿區天神町23-1（UNPLAN Kagurazaka 1F）
營業時間：9:45am~11:00pm（休息日期每月唔同，可於官網查詢）
官網：https://www.solosauna-tune.com/

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）