2米高巨型 Lego 熊貓登陸尖沙咀！過千「市民」懶理限聚令蜂擁搶先圍觀

相信唔少 Lego 迷對嚟緊喺出年 1 月於尖沙咀 K11 MUSEA 開幕嘅香港樂高®探索中心（LEGOLAND Discovery Center Hong Kong）都已經期待已久，而喺正式有得玩之前，Lego 就深知大家等咗好耐，所以就連先展示巨型熊貓模型畀大家止吓隱先！

香港樂高®探索中心早前為咗中心喺 2021 年 1 月 25 日開幕倒數揭開序幕，首度展示咗一隻重達 300 公斤嘅巨型 Lego 熊貓模型。而除咗熊貓模型，佢哋仲準備咗過千名 Lego 市市民喺尖沙咀海濱長廊率先同依隻色彩繽紛嘅熊貓作近距離接觸。

巨型熊貓高約 2 米，由捷克藝術家 Jan Boudník 及其團隊花近 440 小時以成千上萬件 Lego 組合而成，係全球樂高®探索中心內唯一一隻以熊貓作為主題嘅巨型展品，其象徵住「和平」及「福氣」，希望能夠藉此為香港市民帶嚟平安及好運。

而依隻巨型熊貓亦有遵守入境限制，自我喺木箱中隔離咗 14 日先同大家見面㗎！

巨型熊貓喺尖沙咀海濱長廊展出後，亦會遷入香港樂高®探索中心及梳士巴利公園，並與中心嘅互動區、遊樂設施及其他創意建築近在咫尺。

各位 Lego 迷記得唔好錯過喇！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）