《香港愛情故事》金像影后葉童客串飾演劉子碩媽媽　網民大讚新加坡口音學到十足十！

近期 TVB 熱播嘅《香港愛情故事》不知不覺已經嚟到尾聲，除咗羅天宇龔嘉欣呢對嘅去向備受關注之外，劇中游嘉欣、徐文浩及劉子碩嘅三角戀都成為話題。最近一集中，劉子碩帶游嘉欣見家長，而飾演劉子碩媽媽嘅竟然係金像影后葉童！

劇中，「子婷」（游嘉欣 飾）以為「Hugo」（徐文浩 飾）家庭富裕，於是同佢拍拖，其後發現原來「Hugo」係住公屋後大失所望。之後佢又遇到來自新加坡嘅交流生「周帆」（劉子碩 飾），覺得「周帆」上進又有錢，面對兩男，「子婷」猶豫不決，決定一腳踏兩船，不過後來被「Hugo」發現，兩人分手。

Photo from TVB USA Official@YouTube

Photo from TVB USA Official@YouTube

最近一集中，「周帆」帶「子婷」去見家長，而今次劇組竟然邀請到金像影后葉童客串出演「周帆」媽媽！葉童已經闊別港劇 10 年，上次出演嘅劇集已經係 2010 年嘅《摘星之旅》，今次劇組竟然邀請到葉童客串，真係非常厲害！葉童今次客串「周帆」媽媽一角，係一個闊太角色，貴氣十足，同葉童嘅氣質好相似。

Photo from TVB (official)@YouTube

Photo from TVB (official)@YouTube

由於「周帆」係來自新加坡，因此葉童今次嘅台詞全部都係普通話、英文夾雜，一句廣東話都冇，不過葉童竟然將新加坡口音演繹得非常好，簡直學到一模一樣！劇集一出街，唔少網民都大讚葉童做得好好，「很有氣派，新加坡英文一流 」、「連新加坡口音都學得十足十」、「葉童氣場無得輸」。

Photo from TVB (official)@YouTube

Photo from TVB (official)@YouTube

雖然葉童只係客串，而且戲份唔多，不過單單呢一幕已經充分展現到葉童嘅氣場及演技，仲將新加坡口音學到咁似，果然係金像影后！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）