韓國 YouTuber 洗衣機做韓式拌飯　網民：媽媽們一定好唔鍾意呢條片

拌飯係韓國嘅傳統食物，相信唔少人都食過。最近一個韓國 YouTuber 就做咗一個實驗，將米飯、伴菜及辣椒醬倒入洗衣機做拌飯！

一位韓國 YouTuber 「공대생 변승주 DS」最近拍咗一條實驗短片，表示雖然好多人鍾意食拌飯，不過都有人覺得攪勻拌飯嘅過程好麻煩，於是佢就腦洞大開地試吓用洗衣機整拌飯，到底結果係點呢？

Photo from 공대생 변승주 DS@YouTube

呢位 YouTuber 為咗拍今次嘅實驗短片，仲買咗個新嘅洗衣機，將所有嘢 set 好後，佢先將辣椒醬倒入洗衣液格，再將麻油倒入衣物柔順劑格，之後再將米飯、伴菜倒入洗衣機，然後就啟動洗衣機。

Photo from 공대생 변승주 DS@YouTube

Photo from 공대생 변승주 DS@YouTube

Photo from 공대생 변승주 DS@YouTube

洗衣機將所有食物反轉再反轉，一啲大豆芽菜仲黏住喺洗衣機門度，其實望到呢個畫面已經冇晒胃口。經過一段時間後，拌飯終於完成，個製成品好似似模似樣咁，不過啲米飯經過一輪攪動後竟然變成飯糰，真係見到都唔想擺入口。

Photo from 공대생 변승주 DS@YouTube

Photo from 공대생 변승주 DS@YouTube

Photo from 공대생 변승주 DS@YouTube

到試食嘅時候呢位 YouTuber 都非常猶豫，食咗一啖之後就表示個味道係安全嘅，不過就唔知啲洗衣機水有冇滲入啲飯度，其他工作人員試食後就表示比想象中好食，撇除啲飯凍冰冰，其實就係平常嘅拌飯。

Photo from 공대생 변승주 DS@YouTube

Photo from 공대생 변승주 DS@YouTube

Photo from 공대생 변승주 DS@YouTube

短片一出，網民反應兩極，有網民表示唔應該拎食物開玩笑，都有網民表示用洗衣機做拌飯呢個 idea 真係新穎大膽，亦有網民搞笑地話媽媽們應該唔鍾意呢條片。

呢個取材真係腦洞大開，而且都有啲嘔心⋯⋯呢位 YouTuber 最後都有奉勸大家千萬唔好拎屋企嘅洗衣機做拌飯！大家千萬唔好學啊！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）