張柏芝出席大陸活動唱首本名曲卻瘋狂走音 場面超尷尬要即場道歉

張柏芝喺廣州出席商業活動，更大晒歌喉唱出首本名曲《星語心願》，點知竟瘋狂走音，雖然佢開聲前已表示無綵排過，但仍即場道歉希望大家包涵，片段曝光後網民狠批佢「唔敬業」。

三子之母張柏芝近年好少出演電影、電視劇等作品，但仍有不時出演大陸綜藝節目。

佢日前出席廣州商演活動，更大展歌藝獻唱首本名曲《星語心願》，不過開聲前佢就預告自己狀態唔係幾好，指雖然唱得難聽，但仍會盡全力。

果然喺唱歌中間張柏芝咳咗好幾次，高音完全上唔到不突止，更大走音，甚至仲忘詞，場面相當尷尬。

柏芝似乎都感到唔好意思，即刻向在場觀眾道歉：「因為無綵排過，希望大家多多包涵。」

佢又解釋最近比較忙所以失聲，希望觀眾感受到佢嘅熱誠，同體諒佢失聲。有指張柏芝呢次演出有近$100萬歌酬。

不過片段曝光後網民就狠批佢唔敬業，又走音又忘詞，無綵排唔係理由，而係態度問題，指佢唔尊重觀眾。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）