拍拖半年屢傳婚訊！馬國明、湯洛雯再傳明年結婚 靚湯超無奈回應

馬國明、湯洛雯自6月承認戀情以嚟屢次傳出婚訊，兩人早已明言視彼此為結婚對象，不過結婚消息都被佢哋否認。今日再有傳馬明靚湯將於下年結婚，靚湯爸爸更會送馬鞍山半億別墅做嫁妝，靚湯喺IG無奈回應。

藝人馬國明、湯洛雯喺6月13日齊齊喺IG發情侶公仔相公開戀情。兩人拍拖消息獲各界祝福。

自從佢哋公開戀情後就不時高調晒恩愛放閃，唔止喺公開場合大方提起另一半，又喺IG留言互動。靚湯亦不諱言同男友有討論過結婚問題。

馬明年齡唔細，唔少fans仲開始催婚，而靚湯表示屋企人對馬明相當滿意，更畀足100分！

而早喺10月初已傳出馬明有意喺疫情後同靚湯結婚，靚湯否認會閃婚，佢表示結婚慢慢計劃好多，又要買樓，暫時想儲錢先。

唔夠一個月再傳出馬明求婚成功，將會喺出年初迎娶靚湯，而馬明當時亦表示無求婚，佢話最近非常忙碌，未有時間諗結婚呢樣嘢。

兩個月後再有消息指馬明靚湯下年將正式拉埋天窗，馬明更會搬入湯洛雯爸爸湯鎮宗送贈嘅馬鞍山半億豪宅。

拍拖半年3度傳婚訊，靚湯喺IG Story回應傳聞：「又黎？」留下一個「笑到碌地」嘅emoji，似乎無奈得嚟又哭笑不得。

兩人多次表示如果有好消息一定會公開畀大家知，暫時都未有結婚打算。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）