《哈利波特》原班人馬有望回歸拍新電影！主要角色或以中年身份拍續集？

《哈利波特》最後一集已於10年前上映，近日有消息指Daniel Radcliffe、Rupert Grint、Emma Watson等原班人馬將會再度拍攝新電影，以中年人身份回歸魔法世界，令fans非常期待。

《哈利波特》系列小說、電影喺全球都相當受歡迎，而飾演三位主角「哈利波特」、「榮恩」、「妙麗」嘅演員亦因為呢個系列電影而廣為人知。

《哈利波特》系列電影最後一集《死神的聖物（下集）》已經喺2011年上映，唔經唔覺，哈利、榮恩、妙麗佢哋已經暫別大家10年咁耐。

近日有消息指華納兄弟正商討開拍一套新電影，知情人士Daniel Richtman指電影公司同幾位原班人馬都有進行過一段時間嘅溝通。

消息指因為疫情關係，有關計劃進度相當緩慢，但最近開始進展得相當順利，呢套神秘新電影可能好快就會公佈官方消息。

雖然未知新電影會講咩，但有指《哈利波特》系列嘅原班人馬，包括飾演「哈利波特」嘅Daniel Radcliffe、「榮恩」Rupert Grint、「妙麗」Emma Watson、「馬份」Tom Felton等主要演員都會重返魔法世界！

《哈利波特》原著作者J.K. Rowling喺2007年推出最後一集小說後已表明《哈利波特》嘅故事已經結束，佢亦無打算會再寫有關哈利波特嘅書。

外媒報道新電影可能係改編2016年嘅《Harry Potter and the Cursed Child》劇本，故事講述哈利波特等人擊敗佛地魔後嘅掙扎，故事會提及主角童年時嘅創傷。可以話係《哈利波特—死神的聖物》嘅續集。

雖然依家咩正式消息都無，但係fans都好期待馬班人馬回歸。2021年將係《哈利波特》系列電影上映20周年，一班演員已預告會重聚，唔知係咪就係指會合作新電影呢？

資料來源：We Got This Covered、THE EXPRESS TRIBUNE

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）