《聲夢傳奇》參賽者大談情史　Yumi 鍾柔美被指係校花自信承認：可以咁話嘅

By Ella on 05 Jan 2021

Digital Content Writer

TVB 推出選秀節目《聲夢傳奇》，早前一眾參賽者正式亮相，全部年紀輕輕但唱功了得，最細更只年僅 14 歲，引起迴響。早前一班參賽者作客《後生仔傾吓偈》大談情史，有參賽者直言馮盈盈係理想型，更有參賽者自信承認自己係校花？

Photo from 《後生仔傾吓偈》

TVB 選秀節目《聲夢傳奇》一班參賽者早前作客《後生仔傾吓偈》，同一眾主持大談情史，各自自爆現時感情狀況。當中 17 歲嘅 Felix 林智樂就自爆自己未拍過拖，係 A0，「仲乾淨」，引起主持人爆笑。而被問到理想型係點嘅時候，就直言「係姓馮嘅女主持」，大膽表白馮盈盈，氹得馮盈盈非常開心，Felix 更話自己由「Dr. Protein」時已經好鍾意馮盈盈，最後馮盈盈仲話會 follow 佢 IG，令 Felix 非常開心：「贏咗盈盈 follow 啊！」

Photo from 《後生仔傾吓偈》

參賽者當中唱得又跳得嘅 Hugo 黃奕斌就自爆自己拍過 3 次拖，初戀更係一見鍾情，仲用「白紙」、「豹紋」及「炸彈」去形容三任前女友，非常搞笑。

Photo from 《後生仔傾吓偈》

Photo from realybwong@IG

一眾參賽者年紀咁細，當然有啲仲係未拍過拖，好似 15 歲嘅 Gigi 炎明熹及 14 歲嘅 Yumi 鍾柔美都係 A0。Yumi 外表斯文乖巧，當陸浩明問到學校有冇男仔追嘅時候，Yumi 都好直接表示有，一眾主持都話佢似係好多男仔追，6 號仲讚 Yumi 應該係校花，Yumi 亦非常自信唔否認：「可以咁話嘅。」而當主持人問到在場有冇邊個男仔類近自己理想型嘅時候，Yumi 就表示係 Hugo，Hugo 更用「爆炸糖」形容 Yumi，引得一班主持人大笑。