日本職人雪匠超細膩雪雕賦予雪全新生命！還原龍貓/鬼滅/Minion等人氣動畫角色

因為香港處於亞熱帶地區，出現降雪現象嘅機率甚低，好多時候想玩雪嘅話都要去到日本或歐美地方先可以盡興，但因為疫情問題，睇怕今個冬季都難以出國睇雪。不過唔緊要，冇得去現場睇，喺網絡世界睇住相止吓癮先都唔錯呀！近日喺 Twitter 上有一個叫做 mokomoko_2015 嘅帳號，入面就有好多同雪有關嘅作品，精緻嘅程度簡直令人嘩然。原來雪都可以咁好玩！

依個作品係佢 2021 年第一個同大家分享嘅作品，貓仔好似人咁坐喺樓梯級上面，望住出面笑瞇瞇，睇落非常可愛！相信如果有貓奴行過嘅話，一定會忍唔住同佢合照一張留念！

Photo from mokomoko_2015@Twitter

貓貓當然唔係佢唯一一張動物作品啦！佢就曾經分享過用雪堆成嘅大白鯊！模仿咗佢喺海中伸個頭出嚟作狀要咬人嘅氣勢！口入面每一隻尖齒都整得好仔細，望到都覺得超級有耐性呀！睇到後面嘅兩隻貓主子都目瞪口呆。

Photo from mokomoko_2015@Twitter

唔止現實生物，作品嘅範圍亦會涉獵到二次元角色。佢揀咗霜奶仙做佢 2020 年最後嘅作品，依隻精靈本身就係偏奶白色，用雪堆完出嚟真係好好睇，加埋作者嘅技術，望落簡直係栩栩如生添！佢都同大家分享過佢同夢夢「相遇」嘅過程，入面嘅夢夢比例恰到好處，眼睛亦都做得好細膩。相信如果寵物小精靈嘅粉絲行過依兩件作品，可能都會懷疑自己眼花，竟然喺真實世界見到寵物小精靈！

Photo from mokomoko_2015@Twitter

Photo from mokomoko_2015@Twitter

大家最愛嘅 Minions 都一樣有作品，而且非常出色！作者竟然完美拿捏到三隻 Minions嘅搞怪比例，更加可以做到表情好招積嘅 Bob，企喺度個樣一副無奈嘅 Stuart 上面，依個唔單止係三隻 Minions，更加係一個好搞笑嘅場景嚟！

Photo from mokomoko_2015@Twitter

普通版嘅胖虎可能會冇咁受歡迎，但如果係靚仔版嘅胖虎呢？作者都分享過做雪堆成嘅靚仔版胖虎！入面標準嘅濃眉大眼，斯文有禮嘅微笑，仲有具有象徵性嘅間條衫，作者全部都冇遺忘到！極出色嘅表現實在令人印象深刻。

Photo from mokomoko_2015@Twitter

除咗傳統作品，當然都唔少得最近大熱嘅《鬼滅之刃》啦！佢就喺雪地上面重現咗十二鬼月嘅下弦之伍出嚟！雖然係雪啫，但真係完全冇馬虎到，累極具標誌性嘅頭髮同埋臉部特徵真係一樣都冇少到，令人一睇就肯定到係蜘蛛之鬼！

Photo from mokomoko_2015@Twitter

最後不得不壓軸出場嘅一定就係用雪整出嚟嘅「貓巴士」！除咗精緻嘅手手腳腳，連上面兩隻老鼠仔都完美呈現之外，更加係可以著燈㗎！搭配埋黃光嘅燈光，真係非常之靚，同動畫入面部貓巴士嘅眼睛顏色極為相似，花費嘅心力同創意令人萬分佩服！

Photo from mokomoko_2015@Twitter

Photo from mokomoko_2015@Twitter

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）