Switch Mario主題特別機登場　即日起有得預訂！2月12日正式發售

Switch 又有新嘅特別版主機要推出啦！繼上年任天堂推出過《動物森友會》嘅特別版主機，湖水綠加上淺藍嘅配色引嚟唔少玩家為之著迷，話就算唔玩都要買部嚟收藏！而今次依部將會以 Mario 配色做主題推出啦！

任天堂推出新遊戲嘅時候，周不時都會連帶埋有特別配色嘅主題機一齊出現！好似《動物森友會》、《 Pokémon: Let's Go》、《任天堂明星大亂鬥》嘅時候都曾經推出過唔少令玩家眼前一亮嘅靚機，唔少人更加係會買嚟收藏添。今次臨近《超級 Mario 3D世界 ＋ 狂怒世界》發售，任天堂又為大家帶嚟咗新嘅主題機啦！

Photo from 任天堂官網

今次嘅特別機係用咗經典角色 Mario 為設計主題，即日起開始接受預訂（預訂店舖一覽： LINK），預定 2 月 12 日正式公開發售！今次嘅「Nintendo Switch Mario 亮麗紅 X 亮麗藍 主機組合」入面，除咗主機本體同配件之外，更加贈送咗「瑪利歐亮麗紅 X 亮麗藍版」嘅 Switch 便攜包，不過官方定價同樣做番 HKD $2,340！真係又靚又抵呀！

Photo from 任天堂官網

Photo from 任天堂官網

Photo from 任天堂官網

Photo from 任天堂官網

不過大家就要留意番，雖然會喺同日一齊推出，但係新嘅主機組合包入面係唔包括《超級 Mario 3D世界 ＋ 狂怒世界》依隻遊戲嘅，如果玩家想玩嘅話，就要喺實體舖買埋隻實體版遊戲，又或者喺任天堂嘅 eShop 購買數位版，官方訂價為 HKD $429！

Photo from 《超級瑪利歐 ３Ｄ世界 ＋ 狂怒世界》2nd 介紹影片（香港）截圖

《超級 Mario 3D世界》2013 年時曾經喺 Wii U 推出過，而新次依隻 switch 版就會新增咗全新要素，故事背景會以 7 位公主被庫巴捉走咗，所以 Mario 需要喺以透明水管連成嘅「妖精王國」上尋找佢哋嘅旅程！遊戲難度會易玩咗，提升咗移動速度，亦都因應 Switch 嘅機能而添加咗陀螺儀操作。玩家喺冒險時亦會拎到唔同嘅道具，有機會變成貓咪形態，可以比起前作更長嘅爬牆同空中滑行時間，同時亦有機會變出分身，以唔同嘅姿態提升力量！

不過如果玩家真係喺同一個場地 Fail 咗好多次，亦都可以化身為無敵嘅「白狸 Mario」，咁就唔使驚卡關嘅問題。今作同前作一樣，都係可以支援多人遊玩，最少一個人，最多可以四人一齊去救公主，到達「終點的旗杆」為之勝出！

Photo from 《超級瑪利歐 ３Ｄ世界 ＋ 狂怒世界》2nd 介紹影片（香港）截圖

而今次推出新機，亦再次引起唔少人對傳聞中嘅 Switch Pro 嘅好奇心。雖然任天堂曾經否認過會有 Switch Pro 嘅存在，但係唔少資料都指出任天堂正喺度研發緊一部代號為「Aula」嘅新型號，並有人爆料話會採用 OLED 螢幕、可以支援 4K 輸出、會有新 Dock 等等嘅傳言！市場預期大概 3 月左右推出，孰真孰假，大家好快就會知道真相！

Photo from 任天堂官網

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）