【日本四國】小豆島4大必去景點推薦!一日只出現2次天使之路、昭和時代電影村

【日本四國】小豆島4大必去景點推薦!一日只出現2次天使之路、昭和時代電影村

ByCharlotte on 29 Jan 2021

實在太耐無去旅行心癢癢,忍唔住search定啲旅遊靚景止吓渴先!小編已經諗好解封後第一個目的地絕對會係日本四大島當中最細嘅四國~當地天然資源豐富,除咗四面環海,可以欣賞到著名嘅瀨戶內海之外,仲充滿文化歷史景觀!今次小編就同大家介紹吓位於四國香川縣,最有代表性之一嘅島嶼——小豆島!當中包括現實版動漫電影場景同超靚嘅自然奇觀,想去四國嘅你一定要留意啦!

必到景點#1 小豆島橄欖公園 -《魔女宅急便》取景地

宮崎駿迷必去嘅小豆島橄欖公園,呢度係電影《魔女宅急便》嘅取景地。企喺山坡上望出去,一面無際嘅天藍色海平面就係非常有名嘅瀨戶內海,加埋岸邊嘅希臘風車,不知不覺間,你就成為咗電影主角啦!

呢度仲有掃把租借服務,而且係免費㗎~ 一場嚟到當然要化身魔女琪琪,體驗一下騎住掃把飛越嘅一刻啦!

小豆島氣侯乾燥少雨,係日本最早引進橄欖嘅地區,所以橄欖亦係小豆島嘅特產。嚟到公園,記得去紀念館睇吓各式各樣嘅橄欖產品,好似橄欖油、橄欖雪糕、美容產品等等。園內嘅Corico喺電影入面係一間麵包店,現實仲Corico變身雜貨店,販賣花草茶同花卉飾品。

【小豆島橄欖公園】
地址:〒761-4434 香川縣小豆郡小豆島町西村甲1941-1
營業時間:8:30-17:00(無休)
網址:https://www.olive-pk.jp/zh/

必到景點#2 二十四の瞳映画村

二十四の瞳映画村同樣位於小豆島,係電影《二十四之瞳》嘅拍攝地,拍攝時搭建嘅外景場地亦有保存原貌。《二十四之瞳》係日本著名小說家壺井榮,其中一部最具代表性嘅小說作品,後來被兩次搬上大銀幕。

《二十四之瞳》故事由1928年講起,以昭和時代初期嘅小豆島為舞台,講述一位剛畢業嘅小學老師,嚟到呢個偏遠嘅鄉村小學任教,雖然起初有啲格格不入,但後來都同嗰十二位學生打成一片,而「二十四瞳」就係指十二位學生嘅眼睛。無奈後來因為經歷二次大戰後,鄉村已經人事全非,小學老師喺戰後重返鄉村,同幸存嘅學生重聚嘅故事。

電影村嘅每個角落,無論民居、小路定木造校舎,都可以完全感受到昭和時代嘅日本,嗰種古早懷舊風情,就好似走入時光隧道咁。

就算未欣賞過呢部電影或小說,鍾意鄉村風情嘅朋友,二十四の瞳映画村都係值得你特意到訪嘅地方。

廣告
廣告

【二十四の瞳映画村】
地址:香川縣小豆郡小豆島町田浦
營業時間:9:00-17:00
票價:成人 790日圓
網址:https://www.24hitomi.or.jp/tw/

必到景點#3 最美溪谷!寒溪霞

寒溪霞係日本3大溪谷之一,一年四季風貌都唔同,但係同樣吸引,特別係每逢秋季都會被紅葉染得一片通紅,吸引大批遊人前往觀賞~想飽覽寒霞溪全景,最受歡迎嘅方法就係搭纜車啦!由山下嘅紅雲亭往返山頂,由高處俯瞰成個寒溪霞,真係好壯觀㗎~

另外都有唔少行山友鍾意選擇徒步上山,一共有兩條登山步道,第一條就係同纜車路徑一樣,由紅雲亭前往山頂,沿途可以睇到寒霞溪12景,全長2km;另一條短啲嘅步道就係由猪谷站隔離嘅山路出發,全長1.8km,可以睇到寒霞溪8景~當然自駕遊都係無問題啦!

因為1300萬年前嘅一場火山爆發而誕生嘅寒溪霞景色十分優美,反復嘅地殼變動同風雨嘅侵蝕,溪谷形成唔同嘅懸崖同奇岩怪石群,畫面非常壯觀~呢個美不勝收嘅國家名勝,更加被列入「日本三大最美渓谷」、「日本三大奇景」、「日本百景」同「21世紀最想保留的自然景觀100選」添!

【寒霞溪】
地址:香川縣小豆郡小豆島町寒霞溪
網址:http://www.kankakei.co.jp/index.html

必到景點#4 浪漫之選!天使之路

講到天然景色,不得不提超人氣嘅情侶聖地「天使之路」啦!淨係聽個名都覺得靚,佢係位於小豆島同中余島之間海域嘅一條細白嘅長沙洲,而且每日只會出現兩次。相傳如果戀人拖住手仔行過呢條沙路,就可以得到永恆嘅幸福同埋實現心中願望,咁浪漫~難怪咁受情侶歡迎啦!

其實呢個咁矜貴嘅海上奇觀真名叫做「銀波浦」,係一個陸連島,一共連結4個島嶼,每日朝早同傍晚時分潮退嗰陣先會浮現~漫步喺長約500米嘅沙洲上面,配埋碧海藍天嘅靚景,真係好夢幻啊!島嘅末端仲有個祈福許願繪馬所,大家去到都不妨將願望寫喺心型嘅繪馬上面,再掛起許願啊~

【天使之路】
地址:香川縣小豆郡土庄町銀波浦
網址:http://www.town.tonosho.kagawa.jp/kanko/tnks/info133.html

係咪即刻想將小豆島放入travel bucket list呢~真係好吸引啊,即刻上HK Express官網睇更多旅遊tips啦!

Featured for and Photo from: HK Express and Kagawa Prefectural Government

HolidaySmart 假期日常長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同HolidaySmart 假期日常相關既事物~投稿可以傳送到 holiday@presslogic.com比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!
👉🏻 即刻Follow我哋Instagram holidaysmart.hk
Share to Facebook