「第八屆甦Walk 慈善行．想旅行」　四圍打卡影靚相兼做善事！

喺疫情底下，往日唾手可得嘅出走機會變得彌足珍貴，想去旅行、打卡影靚相變得一啲都唔容易。有見及此，香港善導會（SRACP）推出咗「第八屆甦Walk 慈善行．想旅行」活動，等大家可以邊做善事邊支持善導會中嘅弱勢家庭，齊齊身體力行！

香港善導會自 1957 年成立，主要幫助涉嫌觸犯法紀、曾違法同埋刑滿釋放嘅香港居民重獲新生，並提供社區教育、預防犯罪及精神健康服務畀社會大眾。

Photo from 香港善導會

今次佢哋就籌辦咗「第八屆甦Walk 慈善行．想旅行」，希望可以籌款幫助佢哋會內嘅弱勢家庭，向佢哋伸出援手。

今屆嘅活動方式有全新嘅突破！今次大會唔會設有任何指定路線，參加者喺活動期內唔會受到地域同埋時間嘅限制，可以自由自在咁參加支持。

Photo from 香港善導會

大會亦都特別加入咗「旅行打卡」嘅元素，精心設計咗 8 款印有世界名勝嘅「景點卡」畀大家選購，例如日本富士山、法國艾菲爾鐵塔、英國大笨鐘等等，希望大家喺唔同地方影低「旅行相」，滿足大家嘅旅行欲！

Photo from 香港善導會

同時，每個參加者都可以獲得一張「小孩卡」，鼓勵大家帶埋張卡隨時隨地去打卡影相，寓意大家帶住弱勢家庭嘅小朋友去旅行，鼓勵佢哋走出現有嘅困境，用更廣闊嘅眼界去面對成長挑戰。

Photo from 香港善導會

當大家影完相之後，就可以 Post 張相上自己嘅社交媒體帳號，喺內容度加上「#甦Walk #SRACP 」，呼籲你身邊嘅朋友一齊支持！

Photo from 香港善導會

參加方法：

1. 網上報名／下載報名表格，連同捐款交返畀香港善導會
2. 收到電郵確認報名
3. 收到香港善導會平郵寄出嘅「景點卡」，準備出發去打卡
4. 上傳照片到你嘅 Facebook／Instagram 帳號，加上hashtag #甦Walk #SRACP
5. 分享俾親朋好友叫佢哋一齊參加！

活動報名日期：截至 2021 年 2 月 5 日
活動相片收集日期：截至 2021 年 2 月 21 日
活動時間、地點：參加者自行決定

參加費用：身體力行組 免費（隨機一張景點卡 + 小孩卡）／有心有力組 $50（指定一張景點卡 + 小孩卡）／愛心爆棚組 $280（全套八張景點卡 + 小孩卡）

詳情大家可以參考番官網嘅資料！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）