特色手機殼精選！可愛耐跌各具風格

步入新一年，好多人都會想買啲嘢獎勵自己，希望自己喺今年有個好嘅開始，繼續進步！如果你都有依個諗法，不妨考慮下換咗個手機殼佢？畢竟工作、社交都成日對住部手機，喺佢身上畀啲新鮮感自己，心情都好啲呀嘛！今次就想同大家介紹四個特色手機品牌，希望大家有多啲選擇！

首先梗係由本地品牌「CASETiFY」拉開序幕！依個品牌有多種同電子產品保護有關嘅產品，唔單止有手機殼，亦都有 iPad、Airpods 等等嘅保護套，深受用家歡迎。

Photo from CASETiFY

過去佢亦多次同唔同品牌聯名，包括 DHL、Hello Kitty、Coca Cola等等，為業界帶來突破性嘅創意！最近，佢哋就同 Disney 聯乘，推出大量有關 Mickey Mouse 嘅產品！如果你係米奇老鼠嘅粉絲，就萬勿錯過啦！

Photo from CASETiFY

講完香港嘅本地品牌之後，不得不提嘅就係台灣公司「犀牛盾」，佢哋最出名嘅就係手機殼保護性特強，號稱緩衝材質超越咗軍方嘅跌落標準！佢哋仲成日搵 YouTuber 合作，將最新款嘅 iPhone 套上佢哋嘅手機殼，然後由成層樓高嘅地方跌部手機落地下，都可以毫無損傷！

Photo from 要玩就玩大一點! 摔壞手機直接送你全新iPhone 11!【劉沛 VLOG】

Photo from 要玩就玩大一點! 摔壞手機直接送你全新iPhone 11!【劉沛 VLOG】

佢哋嘅手機殼除咗實用性強外，仲有好多唔同款式，更加有提供個人化服務，一定可以滿足大部份用家嘅需求！

Photo from 犀牛盾

除咗手機殼保護性強幫到手之外，如果望落好可愛都可以令人感到開朗，幫助大家喺一日當中更有力量㗎。韓國品牌「THENINEMALL」有好多線條簡單，畫風可愛嘅產品！唔少人入到佢哋嘅網站都會變到好花心，唔知應該買邊一款好！

Photo from theninemall

除咗可愛到令人愛不釋手之外，「THENINEMALL」嘅價格仲非常親民，平起上嚟 韓圜 ₩5,000（約港幣 $35）就可以有一個！莫非佢就係特登賣到咁平，等大家唔使破產？

Photo from theninemall

最後要同大家介紹下嘅就係日本牌子「Birth.」。佢根據德國占星術，搵出包含 2 月 29 日在內，366 日嘅誕生色，再將佢哋整成手機殼。每一日都有自己專屬嘅顏色，而喺手機殼上面都會刻上代表住嘅生日日期，除咗盛載住純色設計嘅低調外，亦保留咗獨一無二嘅個性。

Photo from Birth.

依個品牌嘅手機殼除咗可以自用之外，仲非常適合送禮或者同人一齊用！例如係有紀念價值嘅日子，又或者對方嘅生日日期，令人感受到自己嘅貼心。不過要留意，手機殼係落咗單之後先會開始製作，如果想送畀人就要預留番啲時間啦。

Photo from Birth.

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）