Switch 2021年必玩遊戲 芒亨 Zelda Mario 漆彈(持續更新)

Switch 2021年必玩遊戲 芒亨 Zelda Mario 漆彈(持續更新)

ByIvy on 20 Jan 2021

2021 年絕對係機迷值得開心嘅一年!除咗PlayStation、Xbox 等家用主機正式換代,Switch 頻頻傳出強化版主機嘅消息之外,今年仲會有唔少好嘅遊戲推出!今次想同大家推介 2021 年推出,Switch 平台上嘅必玩作品,總有一隻啱你口味!各位 Switch 用家,準備好個銀包買 Game 未?

1. HITMAN 3
推出日期:1 月 20 日
分類:動作冒險
《HITMAN》係傳統嘅殺手遊戲。玩家要扮演特工「47號」到唔同嘅地方進行殺人任務。特別嘅係,今代除咗可以玩番前兩代嘅關卡之外,Switch 平台上仲會利用「雲端」形式去進行遊戲,務求玩家喺 Switch 都可以有超卓嘅遊戲體驗。

推出日期:1 月 20 日
Photo from HITMAN 3

2. 魔界戰記 6
推出日期:1 月 28 日
分類:戰略角色扮演
《魔界戰記》系列主打歡樂惡搞,無厘頭嘅系統受到玩家歡迎,例如話最高等級可以有 9999 萬 9999 級,最大傷害可以有成 9999 京之類。今次嘅作品係系列嘅最新作品,更首次採用 3D 化去製作遊戲,得到粉絲期待!

推出日期:1 月 28 日
Photo from 魔界戰記 6

3. 童話森林
推出日期:1 月 28 日
分類:迷宮探索角色扮演
《童話森林》自 2015 年起就由獨立遊戲創作者研發,後來陸續喺唔同平台推出,期間接納咗唔同玩家嘅意見,係一款同粉絲一齊成長嘅作品。今次登上 Switch 平台,進行咗大幅改進,更請到著名聲優竹達彩奈幫手配音,令人好期待呀!

推出日期:1 月 28 日
Photo from 童話森林

4. 小小夢魘 2
推出日期:2 月 10 日
分類:驚悚解謎
喺《小小夢魘 2》入面,玩家要扮演被困喺扭曲世界嘅男仔「摩諾」,要同前作主角「小六」一齊合力解謎、探索世界嘅秘密,並且嘗試逃離壞人嘅魔掌。今作嘅玩家可以運用物品解謎或者防禦,都可以偷偷走過敵人身邊,亦要去全新嘅地方冒險,新要素多到好吸引呀!

推出日期:2 月 10 日
Photo from 小小夢魘 2

5. Super Mario 3D World + Bowser’s Fury
推出日期:2 月 12 日
分類:動作
無論有冇打開機嘅人,相信都一定聽過 Mario 依個名!今次 Switch 平台上就會推出舊作《Super Mario 3D World》嘅強化移植版,同時加入「Bowser’s Fury」嘅全新內容,變成《Super Mario 3D World + Bowser’s Fury》!咁經典嘅作品你又點可以錯過呢?記得買番隻,同朋友一齊去救公主啦!

推出日期:2 月 12 日
Photo from Super Mario 3D World + Bowser’s Fury

6. 痞子英雄:泰索斯遺跡
推出日期:2 月 23 日
分類:角色扮演
《痞子英雄:泰索斯遺跡》採用像素畫風,等大家可以獨自或者同朋友一齊探索依個「粒粒」世界!隨機生成嘅地下城同埋超級厲害嘅泰坦巨人喺度等緊大家去挑戰佢哋,仲有多種職業、經典武器同埋可供升級嘅城鎮畀大家管理!約埋朋友打番日機嘅話,依隻作品都係好好嘅選擇!

推出日期:2 月 23 日
Photo from 痞子英雄:泰索斯遺跡

7. 牧場物語 橄欖鎮與希望的大地
推出日期:2 月 25 日
分類:角色扮演
一直廣受玩家歡迎嘅《牧場物語》系列又有全新作品啦!今次大家去到爺爺同伙伴一齊開拓嘅「橄欖鎮」,決意重振番爺爺依個被荒廢,仲要被森林覆蓋嘅大牧場。系列必備嘅種田、挖礦、釣魚今作當然會有,仲會有大量未見過嘅角色等緊大家!鍾意牧場生活嘅朋友一定要預購啦!

推出日期:2 月 25 日
Photo from 牧場物語 橄欖鎮與希望的大地

8. 經典回歸 魔界村
推出日期:2 月 25 日
分類:動作
經典系列《魔界村》返嚟啦!今次嘅作品係用咗《魔界村》同《大魔界村》做原型嘅全新作品,前作一向以「好難玩呀!」而聞名,雖然操作簡單,但係非人嘅難度就一直深深吸引住玩家,相信今次嘅全新作品一定令到粉絲好興奮!唔知今次又會點樣「折磨」玩家呢?

推出日期:2 月 25 日
Photo from 經典回歸 魔界村

9. 勇氣默示錄 2
推出日期:2 月 26 日
分類:角色扮演
《勇氣默示錄 2》由前作同埋《八方旅人》嘅團隊共同開發嘅全新遊戲,剩係聽班底都令人夠哂興奮!故事入面,船員、公主、旅行者同埋傭兵為咗完成各自嘅使命同目的,一齊開始咗旅程。玩家要善用「BP」,決定要連續攻擊抑或鞏固防禦,採取恰當嘅行動先可以取勝!

廣告
廣告

推出日期:2 月 26 日
Photo from 勇氣默示錄 2

10. 電玩版 哆啦A夢 大雄的宇宙小戰爭 2021
推出日期:3 月 5 日
分類:派對
《電玩版 哆啦A夢 大雄的宇宙小戰爭 2021》預定同電影同日登場,係一款用電影做改編嘅派對遊戲!遊戲會用番電影登場嘅地方作為舞台,活用 Joy-Con 去玩競速、射擊、節奏等等嘅小遊戲,除咗可以自己玩之外,都可以叫埋朋友仔一齊玩㗎,想放鬆下就一流啦!

推出日期:3 月 5 日
Photo from 電玩版 哆啦A夢 大雄的宇宙小戰爭 2021

11. A 列車 開始吧 觀光開發計劃
推出日期:3 月 12 日
分類:模擬經營
《A 列車》系列要踏入 35 周年啦!玩家喺遊戲入面要扮演鐵路公司嘅社長,鋪鐵路之餘仲要整公共設施,經營子公司推進城市發展,賣廣告提升公司形象……絕對唔係埋站就落車咁簡單嘅遊戲!如果對模擬經營有興趣嘅朋友,不妨試下依隻遊戲!

推出日期:3 月 12 日
Photo from A 列車 開始吧 觀光開發計劃

12. 波斯王子:時之沙 重製版
推出日期:3 月 18 日
分類:動作冒險
《波斯王子:時之沙 重製版》係 2003 年作品嘅重製版,喺 Switch 平台再次呈現經典之作。玩家要以「波斯王子」嘅身份進行遊戲,喺維齊爾手上拯救自己嘅王國。值得一提嘅係,今次嘅作品加入咗現代化嘅操控方式,亦同時保留舊作嘅操控配置,畀新舊玩家都可以盡情享受!

推出日期:3 月 18 日
Photo from 波斯王子:時之沙 重製版

13. 英雄傳說 閃之軌跡 IV -THE END OF SAGA-
推出日期:3 月 18 日
分類:角色扮演
《英雄傳說 閃之軌跡 IV》登陸 Switch 平台啦!雖然之前已經喺 PS4 上推出過,但今次針對住 Switch 進行最佳化,亦支援「高速略過模式」,仲會收錄哂 PS4 度嘅 DLC!可以用抵到爛嘅價錢一試經典系列,粉絲同未玩過嘅機迷都唔好錯過啦!

推出日期:3 月 18 日
Photo from 英雄傳說 閃之軌跡 IV -THE END OF SAGA-

14. Monster Hunter Rise
推出日期:3 月 26 日
分類:動作角色扮演
又夠鐘屠龍啦!「芒亨」會喺 3 月 26 日推出全新作品《Monster Hunter Rise》,其中包括全新魔物「怨虎龍」,仲有「翔蟲」同埋新隨從「加爾克」,加埋型到癲嘅「操龍」系統!各位獵人,依家即刻去 eShop 預購啦!

推出日期:3 月 26 日
Photo from Monster Hunter Rise

15. 家庭訓練機
推出日期:4 月 29 日
分類:體感運動
先前嘅《健身環大冒險》掀起咗體感運動遊戲嘅熱潮,依家又有新嘅運動遊戲推出啦!玩家只需要用腿部固定帶將 Joy-Con 綁喺腳度,就可以利用跑步、跳躍嘅動作挑戰各種關卡!遊戲仲針對都市人運動不足嘅問題,加入咗「每日 5 分鐘簡單訓練」、「飯後輕鬆訓練」等等多種模式,健康今次真係冇難度啦!

推出日期:4 月 29 日
Photo from 家庭訓練機

16. 符文工廠 5
推出日期:5 月 20 日
分類:角色扮演
《符文工廠》嘅粉絲等咗 8 年,終於等到系列新作!失去記憶嘅遊戲主角去到擁有豐富自然景觀嘅城鎮,加入咗守護當地和平嘅組織,並展開對「符文」憑空消失嘅調查。作為《牧場物語》嘅姊妹作,玩家可以同時享受冒險同生活兩大要素,機迷一定唔可以錯過呀!

推出日期:5 月 20 日
Photo from 符文工廠 5

除咗上面依堆已經有推出日期嘅遊戲必玩之外,其實都早有人爆料話今年仲會推出更多經典作品嘅續作或者復刻版,簡直係遊戲界嘅豐收之年!包括 Switch 推出早期嘅護航作品,《薩爾達傳說 曠野之息》嘅續作,刺激緊張嘅《漆彈大作戰》,經典嘅《火焰之紋章》同《銀河戰士》,甚至有《寵物小精靈鑽石珍珠》復刻嘅消息流出!睇嚟今年個荷包都係保唔住㗎啦……

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mailholiday@presslogic.com,直接將資料傳比小編)

HolidaySmart 假期日常長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同HolidaySmart 假期日常相關既事物~投稿可以傳送到 holiday@presslogic.com比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!
👉🏻 即刻Follow我哋Instagram holidaysmart.hk
Share to Facebook