download HolidaySmart 假期日常 app
好意頭水果2021|5 款必食賀年吉利生果 桔/柚子/紅火龍果/菠蘿各有不同意義

好意頭水果2021|5 款必食賀年吉利生果 桔/柚子/紅火龍果/菠蘿各有不同意義

水果
By Celia on 26 Jan 2021
Digital Editor

農曆新年就到!最近唔少人都開始為新年作準備,除咗要準備年糕/禮盒之餘,當然仲要準備啲好意頭嘅生果嘅喇!唔少人由細到大都可能見過每逢過年,長輩就會喺屋企擺放大桔、柚子、蘋果及火龍果之類嘅生果,但大家又知道依啲生果有咩意思呢!?今次就同大家講吓 5 款最常見嘅生果,見吓佢哋到底有咩好意頭喇~

1. 桔

桔係深秋初冬嘅時令水果,喺新年時唔少人家都會喺屋企擺放一盆「年桔」,顧名思義,取其諧音希望新一年大吉大利嘅意思。所以,桔絕對係新年必備嘅生果嚟。

桔

而每年亦會有人擺放「金桔」,其名字更為富貴,金桔外表金燦燦,有金玉滿堂、發財以及大吉大利等美好寓意。另外金桔唔似年桔咁酸,仲可以連皮帶肉一齊食,有清熱潤肺功效。因此逐漸成為過年必擺嘅吉祥生果。

2. 蘋果

蘋果外皮好似紅寶石咁鮮紅,而且平滑圓潤,所以有象徵平安、祥和之意,故被視為「吉祥富貴」。

蘋果

3. 柚子

柚子中嘅「柚」字與保佑嘅「佑」字發音相似,所以無論喺新年或中秋時都會出現喺枱上,一般柚子會擺到元宵過後先剝嚟食。喺食之前,唔少人都會以佢同蘋果作為「觀賞」以及保佑新一年平安。

柚子

4. 紅火龍果

火龍果係近年嘅大熱水果嚟,其火紅色嘅外形,畀人一種「紅紅火火」的寓意。因此做生意嘅人特別鍾意喺初一時喺餐枱上擺上幾個鮮艷奪目嘅紅火龍果,寓意新一年生意大紅大紫。而紅火龍果亦含有大量嘅膳食纖維,有助於腸胃蠕動,防止便秘啱晒過年嘅時候食。

紅火龍果

5. 菠蘿

菠蘿又稱為鳳梨,而喺閩南話中亦同「旺來」同音,有富有、興旺、好運連連嘅意思,因此喺過年有人會食菠蘿,象徵「好運旺旺來」。而且菠蘿含有膳食纖維、有機酸、維生素B1、維生素C、類胡蘿蔔素、菠蘿蛋白酶,鉀及多種礦物質等。當中維生素C嘅含量更係蘋果嘅5倍,可減緩關節與肌肉發炎等疼痛、具有纖維可促進消化、新陳代謝、改善呼吸道等功能。

菠蘿

唔知大家喺新年時又會喺餐枱上擺上咩吉利生果呢?!

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel