韓國生日島三層超巨型水果海鮮蛋糕 曾被選為韓國人最想去島嶼之一！
唔少去過韓國玩嘅人都必定去過南怡島打卡，事關嗰度除咗係經典韓劇《冬季戀歌》嘅拍攝場地之外，其四季嘅景色更係大家打卡影靚相嘅熱門地嚟，不過最近韓國又有一個新嘅打卡熱點喇！依度就係「生日島」，係呀你冇睇錯，依個島真係叫「生日島」呀～
「生日島」位於全羅南道莞島郡東面嘅一個離島嚟，島嘅原名為「山日島」，後嚟因為大家覺得島上嘅居民性格親切善良，就好似啱啱出生未受世俗影響嘅初生 BB 一樣，而將離島改名為「生日島」，更曾被選為韓國人最想去嘅島嶼之一！
有見及此，島上嘅居民就喺去年 5 月時喺島上嘅西城港客運碼頭設計咗一個全韓國最巨型生日蛋糕模型嚟紀念依件事。
依個蛋糕一共有 3 層，最底層就以各種水果同海洋生物做裝飾，中間同頂層則分別放上蠟蠋同其他裝飾，而喺現場仲設有音樂播放器，可以畀大家選擇播放傳統韓文、輕快純音樂或英文版本嘅生日歌添～
而喺天黑時蛋糕上嘅蠟燭仲會著燈，就好似點起蠟蠋畀大家現場許願一樣，好有心思呀！
另外，喺「生日島」上，除咗有巨型生日蛋糕畀大家打卡外，島上 483 米高嘅白雲山以、金谷海岸以及鶴栖岩（학서암）亦係當地著名嘅景點。
咁多景點可以畀打卡影相，相信喺島上大家應該可以玩足一日。所以如果有興趣嘅大家記得預留多啲時間喇！
生日島 （생일도）
地址：全羅南道莞島郡生日面生日路582 （전라남도 완도군 생일면 생일로 582）
交通：於光州巴士綜合客運站（광주종합버스터미널）乘坐巴士至塘木港（당목항），車程約 3 小時；下車後轉船前往生日島（생일도），船程約 20 分鐘
Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
【想隨時隨地緊貼本地食買玩資訊？】
👉🏻 立即下載 HolidaySmart 假期日常APP
👉🏻 即刻Follow我地Instagram holidaysmart.hk
👉🏻 訂閱我地 Youtube Channel
