download HolidaySmart 假期日常 app
Netflix 2 月 13 套新片推介 藍可兒事件/科幻/浪漫愛情都有!

Netflix 2 月 13 套新片推介 藍可兒事件/科幻/浪漫愛情都有!

電視電影
By Ella on 26 Jan 2021
Digital Content Writer

Netflix 2 月有好多新片即將上架,今次推介 13 套必睇影片,科幻題材、浪漫愛情及動畫都有,仲有以藍可兒事件為主題拍成嘅紀錄片,絕對唔可以錯過!

《新娘不是我》(2 月 1 日上架)
《新娘不是我》(《My Best Friend's Wedding》)係 1997 年美國浪漫喜劇片,由茱莉亞·羅拔絲等主演。故事講述「Julianne Potter」(茱莉亞·羅拔絲 飾)得知自己嘅知己「Michael O'Neal」(德蒙特·莫羅尼 飾)要結婚後,發現自己愛上咗佢,於是用盡千方百計要搶返「Michael」。

《潛行兇間》(2 月 1 日上架)
《潛行兇間》(《Inception》)係 2010 年嘅美國科幻動作驚悚片,由里安納度等主演。故事講述「Dom Cobb」(里安納度 飾)係一名神偷,佢接受咗一項新任務,但係任務非常困難,如果任務成功,呢件事將會成為史無前例嘅完美罪行,不過喺執行任務期間卻遇上神秘敵人,困難重重⋯⋯

《勝利號》(2 月 5 日上架)
《勝利號》係韓國首部以宇宙為背景嘅科幻電影,由男神宋仲基、金泰梨等主演。故事以 2092 年為背景,講述喺太空飛行嘅「勝利號」係一艘專門以清潔太空垃圾賺錢嘅太空船,太空船成員包括「泰浩」(宋仲基 飾)、「張船長」(金泰梨 飾)等人。某日佢哋發現咗具有大規模殺傷力嘅機械人「多蘿西」,於是決定用佢去交換鉅款。

《陰陽師:晴雅集》(2 月 5 日全球獨家播映)
《陰陽師:晴雅集》改編自日本奇幻小說《陰陽師》,由趙又廷、鄧倫主演。故事講述陰陽師「晴明」(趙又廷 飾)奉命封印被鎮壓三百多年嘅禍蛇,「晴明」與武士「博雅」(鄧倫 飾)等人合力斬蛇除妖,卻無意中發現一個驚天陰謀。

《孤味》(2 月 5 日上架)
《孤味》係 2020 年嘅台灣劇情片,由徐若瑄、陳淑芳等主演。故事講述「林秀英」(陳淑芳 飾)身兼父職養大 3 個女兒,女兒們成就非凡,自己亦成為餐廳老闆。後來喺自己 70 歲大壽當日接到丈夫離世嘅消息,籌辦喪禮時更迎來丈夫嘅另一位女人⋯⋯

《隱形城市》(2 月 5 日首播)
《隱形城市》嘅導演卡羅斯·桑塔哈曾入圍奧斯卡金像獎,呢部係佢首次執導嘅真人作品。主角係一位環境保護局嘅警員,佢發現里約熱內盧海灘上一隻淡水豚屍體竟然與自己妻子嘅死有關,繼而發掘出一個神秘嘅世界⋯⋯

《犯罪現場:賽西爾酒店失蹤事件》(2 月 10 日上架)
《犯罪現場:賽西爾酒店失蹤事件》係以 2013 年轟動全球嘅「藍可兒事件」為主題拍攝嘅紀錄片。節目中會訪問當時參與事件調查嘅警員、酒店員工等,解構案件細節。

《犯罪現場:賽西爾酒店失蹤事件》Photo from Netflix

《結叛同行》(2 月 10 日上架)
《結叛同行》(《News of the World》)係 2020 年嘅美國西部劇情片,改編自同名小說。故事講述退役上尉「基德」(湯漢斯 飾)成為一個穿州過省嘅「讀報人」,同百姓分享所見所聞。某天「基德」偶然遇上孤兒「祖安娜」(海倫娜·澤格爾 飾),並決定帶佢與家人重聚。

《紅點殺機》(2 月 11 日上架)
《紅點殺機》講述一對情侶為咗重燃愛火而展開健行之旅,卻喺旅途中遇上身分不明嘅槍手,兩人為咗生存而拼命逃跑。

《岸邊露伴一動也不動》(2 月 18 日上架)
《岸邊露伴一動也不動》係日本作家荒木飛呂彥嘅漫畫《JoJo 的奇妙冒險》嘅第四部《不滅鑽石》中以角色「岸邊露伴」為主角嘅短篇漫畫集,以「岸邊露伴」作為故事嘅中心點。

《明日歐洲爭霸戰》(2 月 19 日上架)
《明日歐洲爭霸戰》以 2074 年為背景,講述當時歐洲因為全球災難而分裂成無數個微型國家,國與國之間互相爭奪統治權,此時,有 3 個青年出現,試圖改變時局。

《同學麥娜絲》(2 月 20 日上架)
《同學麥娜絲》係 2020 年嘅台灣劇情片,由鄭人碩、劉冠廷及納豆等人主演,故事圍繞住一班由高中認識到中年嘅「四人幫」摯友。

《天空侵犯》(2 月 25 日獨家播映)
《天空侵犯》係由三浦追儺原作、大羽隆廣作畫嘅日本漫畫作品。故事講述高中生「本城遊理」意外進入一個莫名嘅世界,為咗見到哥哥,「本城遊理」努力克服恐懼,尋找隊友,對抗呢個奇怪嘅世界。

正啊!有咁多戲,可以慢慢睇~

Text: HolidaySmart Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel