2020年十間最受歡迎嘅 Airbnb 房源！夢幻房源齊集喺泰國/墨西哥/意大利/印尼

Digital Content Writer

2020 年因為疫情，絕大部份嘅時間都唔可以去旅行，所以唔少人都會去 Airbnb 個網睇吓有咩房源，睇啱嘅就加落心願清單，等之後可以去旅行嘅時候即刻 Book 嚟住，順手止吓旅行癮。Airbnb 近日就公開咗 2020 年最多人加入心願清單嘅房源，一齊嚟睇下有冇啱你心水嘅？

近年大家都對郊外地區同埋非傳統嘅旅遊地點產生興趣，希望可以離開大都市嘅繁囂，深入了解旅遊地點嘅風土人情。唔知係咪因為咁，以下落嚟嘅十大房源中有好多都係位於郊外或者海岸線附近，等旅客可以同朋友家人投入大自然嘅懷抱，得到既地道又獨特嘅回憶。

景觀浪漫奢華樹屋（港幣 $310 一晚）
心願清單收藏次數：204,592次
位於哥倫比亞亞美尼亞嘅「浪漫奢華樹屋」位於叢林之間，可以睇晒附近嘅園野風光，親親大自然！佢有半開放式嘅淋浴空間，等你可以喺星空之下沐浴；亦都可以拎本書，飲啖咖啡，瞓喺吊床上面度過一個悠然嘅下晝。

Photo from Airbnb

極簡全白泳池獨立屋（港幣 $565 一晚）
心願清單收藏次數：216,620次
依間咁靚嘅獨立屋處於泰國布吉嘅最南邊，其中一個香港人嘅旅遊聖地！獨立屋嘅一邊由超多塊落地玻璃組成，等大家可以睇到出面嘅泳池之外，都可以舒舒服服咁欣賞靚景。泳池隔離仲有草地畀大家小聚，一家大細嚟度假就啱哂啦！

Photo from Airbnb

墨西哥貝殼之家（港幣 $3,239 一晚）
心願清單收藏次數：255,620次
「貝殼之家」喺墨西哥嘅穆赫雷斯島度，全白同埋咁有特色嘅設計非常搶眼，好似進入咗童話世界一樣咁靚。大家可以去陽台睇下一絕嘅海岸風景，亦可以喺大泳池度游番日水。而且依個房源裝飾得好有心思，到處都係切合主題嘅海螺擺設，真係夠哂誠意㗎！同朋友嚟一人一間房實好爽啦。

Photo from Airbnb

Trullo Edera（港幣 $627 一晚）
心願清單收藏次數：256,518次
依個房源喺意大利奧斯圖尼，望落去成間迷你古堡咁，超級吸睛！依間石頂圓屋嘅屋頂因為日曬而慢慢變得深色，啲牆就白雪雪嘅，咁得意嘅佢仲係屬於世界文化遺產嚟㗎，人生真係冇咩機會住喺咁特別嘅地方㗎！

Photo from Airbnb

意大利豪華山景湖邊別墅（港幣 $754 一晚）
心願清單收藏次數：265,130次
今次嘅房源都係喺意大利，不過就去咗北邊嘅倫巴第。喺露台望出去又有山又有水，非常寫意！喺嗰度同三五知己把酒言歡真係人生一大樂事。佢同著名嘅中世紀村莊里瓦迪索爾托只係爭 150 米，仲要有私人泳池同網球場可以用，度假一流！

Photo from Airbnb

坐擁180度景觀的私人泳池別墅（港幣 $690 一晚）
心願清單收藏次數：269,373次
依間喺印尼峇里島嘅別墅就正啦，喺泳池度可以享受 180 度咁廣闊嘅自然美景，睇到新加拉令人嘆為觀止嘅晚霞。仲大到住足 8 個人都仲大把位，個個都可以有自己嘅私人空間。香港人都成日去峇里島享受生活，依間會唔會係你下次嘅目標呢？

Photo from Airbnb

日落愛琴海秘境洞穴屋（港幣 $2,714 一晚）
心願清單收藏次數：279,779次
依間房源喺希臘聖托里尼，2018 年嘅時候佢仲曾經做過首選㗎！本身佢係一個酒窖嚟，係一間洞穴屋。佢嘅線條好簡單，入面有齊廚房同住客要用到嘅設施，出面就可以曬太陽仲有同睇靚靚日落。嗰度嘅景色本身已經好迷人，如果仲可以住番晚嘅話，更可能係畢生難忘。

Photo from Airbnb

清幽夢幻神秘樹屋（港幣 $3,015 一晚）
心願清單收藏次數：294,039次
今次依間樹屋係喺美國佐治亞州嘅亞特蘭大市中心地帶。話就話市中心，其實間屋四周都係樹林，仲有吊橋互相連接，夠哂自然色彩。住客坐喺床度，望出去就已經係茂密嘅樹林，朝早叫醒你嘅終於唔係鬧鐘，而係雀仔嘅歌聲啦！

Photo from Airbnb

峇里林間私人樹屋（港幣 $471 一晚）
心願清單收藏次數：296,621次
唔怪得咁多香港人鍾意去峇里島玩，原來真係好多正嘢㗎！今次依間樹屋又係位於印尼峇里島，但就係喺海灘嘅上面，有一片大草地同私人泳池可以畀大家遠離大都市嘅忙碌，悠然咁喺度享受大自然嘅寧靜同人生。如果你想去買嘢食或者日用品，商店林立嘅小鎮都只係喺唔遠嘅地方，屋主同時包埋水上活動嘅用品等你去慢慢玩。住喺依度真係又靚又方便呀！

Photo from Airbnb

【想隨時隨地緊貼本地食買玩資訊？】

👉🏻 即刻Follow我地Instagram holidaysmart.hk

👉🏻 訂閱我地 Youtube Channel