《動物森友會》1月免費更新！狂歡節/節分/情人節/農曆新年

喺 Switch 上大受歡迎嘅遊戲《動物森友會》又有免費更新啦！今次任天堂為我哋帶嚟咗「狂歡節」嘅遊戲內容，仲有情人節、節分、農曆新年嘅特別道具，夠晒節日氣氛！28 號就有得 Update 啦喎，一齊嚟睇下未來有咩玩？

Photo from Nintendo

過咗咁耐冬天，又玩咗捉雪花、堆雪人，《動物森友會》又為一眾玩家帶嚟新嘅內容啦！今次嘅更新會喺 1 月 28 日朝早 9 點發布，大家記得 Update 啦！

《動物森友會》為咗多謝大家 Update 到「Ver 1.7.0」，會喺遊戲入面送一個「沙錘」畀大家！記得 2 月 15 日狂歡節當日拎佢出嚟，同其他島友一齊炒熱氣氛啦！

Photo from Nintendo

喺 2 月 15 號狂歡節正式開始之前，玩家就已經可以買到同節日有關嘅物品。

Photo from Nintendo

由 2 月 1 日起，裁縫屋會有森巴服飾畀玩家做好準備，Nook 商店亦會賣裝飾無人島嘅家具，仲有「狂歡節表情Book」，玩家可以學到「跟著節奏」、「炒熱氣氛」、「歡樂！」同「撒紙片」四種搞鬼表情，盡情享受狂歡節！

今年嘅狂歡節係 2 月 15 號（星期一），當日 NPC 舞者「阿歡」會嚟到廣場，全日都喺島上面同大家一齊炒熱氣氛！

Photo from Nintendo

Photo from Nintendo

只有狂歡節當日，亦都即係 2 月 15 日，島嘅空中會出現色彩斑斕嘅羽毛。玩家可以用捕蟲網捉咗佢，然後交畀阿歡，佢就會用熱情嘅舞蹈去獎勵大家！當中，「彩虹羽毛」係好罕見嘅，如果阿歡收到嘅話，一定會好開心啦！

Photo from Nintendo

Photo from Nintendo

但玩家要記得：開始季節係有條件㗎！最重要都係記得一定要 Update 遊戲，「服務處」亦都要已經改建完，同埋日期、時間要同現實一樣呀～

Photo from Nintendo

除咗狂歡節活動之外，《動物森友會》都推出咗好多唔同嘅季節物品畀大家喺遊戲度都可以開心過節～

Photo from Nintendo

適合日本節日「節分」嘅「鬼的服裝」會喺 2 月 1 日起喺裁縫屋開始展示，而「撒豆組合」會由 2 月 3 日起喺「Nook購物」開始訂購。

Photo from Nintendo

Photo from Nintendo

2 月 1 日起至 2 月 14 日，玩家可以喺「Nook購物」度買到「愛心巧克力」同「愛心玫瑰花束」！重要嘅係佢哋每日都係唔同顏色或者款式嘅，如果想收集嘅人一定要日日上線啦！

Photo from Nintendo

1 月 15 日至 2 月 15 日會有「美式足球地毯」同「加油大聲公‧美式足球」畀大家訂！後者仲會日日都唔同顏色或者款式㗎～

Photo from Nintendo

1 月 25 日至 2 月 2 日可以訂到「土撥鼠模型」！

Photo from Nintendo

Photo from NIntendo

2 月 10 日至 2 月 17 日會訂到「韓國新年紅包」、「春節紅包」仲有「春節門飾」！夠晒新年氣氛，喜氣洋洋！

下次嘅免費更新暫定喺 3 月發布！會新增 Super Mario 為題嘅家具，各位玩家記得留意啦。

Photo from Nintendo

另外，喺 3 月 26 日嘅時候，《動物森友會》嘅 amiibo 卡【Sanrio characters合作活動】中文版就會發售㗎啦！

Photo from Nintendo

到時一包會有 2 張隨機嘅卡片同埋 1 張貼紙。成個系列共有 6 款卡片同 6 款貼紙，仲可以同《動物森友會》連動㗎！粉絲千祈唔好錯過呀！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）