《動物森友會》1月免費更新!狂歡節/節分/情人節/農曆新年

《動物森友會》1月免費更新!狂歡節/節分/情人節/農曆新年

ByIvy on 27 Jan 2021

喺 Switch 上大受歡迎嘅遊戲《動物森友會》又有免費更新啦!今次任天堂為我哋帶嚟咗「狂歡節」嘅遊戲內容,仲有情人節、節分、農曆新年嘅特別道具,夠晒節日氣氛!28 號就有得 Update 啦喎,一齊嚟睇下未來有咩玩?

1 月 28 日就有得更新!
Photo from Nintendo

過咗咁耐冬天,又玩咗捉雪花、堆雪人,《動物森友會》又為一眾玩家帶嚟新嘅內容啦!今次嘅更新會喺 1 月 28 日朝早 9 點發布,大家記得 Update 啦!

《動物森友會》為咗多謝大家 Update 到「Ver 1.7.0」,會喺遊戲入面送一個「沙錘」畀大家!記得 2 月 15 日狂歡節當日拎佢出嚟,同其他島友一齊炒熱氣氛啦!

Nintendo
Photo from Nintendo

喺 2 月 15 號狂歡節正式開始之前,玩家就已經可以買到同節日有關嘅物品。

有好多搞鬼表情!
Photo from Nintendo

由 2 月 1 日起,裁縫屋會有森巴服飾畀玩家做好準備,Nook 商店亦會賣裝飾無人島嘅家具,仲有「狂歡節表情Book」,玩家可以學到「跟著節奏」、「炒熱氣氛」、「歡樂!」同「撒紙片」四種搞鬼表情,盡情享受狂歡節!

今年嘅狂歡節係 2 月 15 號(星期一),當日 NPC 舞者「阿歡」會嚟到廣場,全日都喺島上面同大家一齊炒熱氣氛!

依個就係舞者阿歡啦!
Photo from Nintendo

睇嚟島民都會悉心打扮
Photo from Nintendo

只有狂歡節當日,亦都即係 2 月 15 日,島嘅空中會出現色彩斑斕嘅羽毛。玩家可以用捕蟲網捉咗佢,然後交畀阿歡,佢就會用熱情嘅舞蹈去獎勵大家!當中,「彩虹羽毛」係好罕見嘅,如果阿歡收到嘅話,一定會好開心啦!

見到羽毛記得捉住佢!
Photo from Nintendo

收到羽毛嘅阿歡似乎好開心喎!
Photo from Nintendo

但玩家要記得:開始季節係有條件㗎!最重要都係記得一定要 Update 遊戲,「服務處」亦都要已經改建完,同埋日期、時間要同現實一樣呀~

官方話做齊先玩到狂歡節
Photo from Nintendo

除咗狂歡節活動之外,《動物森友會》都推出咗好多唔同嘅季節物品畀大家喺遊戲度都可以開心過節~

今年日本嘅「節分」係 2 月 2 日
Photo from Nintendo

廣告
廣告

適合日本節日「節分」嘅「鬼的服裝」會喺 2 月 1 日起喺裁縫屋開始展示,而「撒豆組合」會由 2 月 3 日起喺「Nook購物」開始訂購。

日日都唔同
Photo from Nintendo

收藏家記得日日報到!
Photo from Nintendo

2 月 1 日起至 2 月 14 日,玩家可以喺「Nook購物」度買到「愛心巧克力」同「愛心玫瑰花束」!重要嘅係佢哋每日都係唔同顏色或者款式嘅,如果想收集嘅人一定要日日上線啦!

依個望落勁 Cute!
Photo from Nintendo

1 月 15 日至 2 月 15 日會有「美式足球地毯」同「加油大聲公‧美式足球」畀大家訂!後者仲會日日都唔同顏色或者款式㗎~

有冇人認得佢呢?
Photo from Nintendo

1 月 25 日至 2 月 2 日可以訂到「土撥鼠模型」!

年~又過年~
Photo from Nintendo

韓國利市都有得買!
Photo from NIntendo

2 月 10 日至 2 月 17 日會訂到「韓國新年紅包」、「春節紅包」仲有「春節門飾」!夠晒新年氣氛,喜氣洋洋!

下次嘅免費更新暫定喺 3 月發布!會新增 Super Mario 為題嘅家具,各位玩家記得留意啦。

下次會用 Mario 做主題!
Photo from Nintendo

另外,喺 3 月 26 日嘅時候,《動物森友會》嘅 amiibo 卡【Sanrio characters合作活動】中文版就會發售㗎啦!

同 Sanrio 角色合作出 amiibo 卡!
Photo from Nintendo

到時一包會有 2 張隨機嘅卡片同埋 1 張貼紙。成個系列共有 6 款卡片同 6 款貼紙,仲可以同《動物森友會》連動㗎!粉絲千祈唔好錯過呀!

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mailholiday@presslogic.com,直接將資料傳比小編)

HolidaySmart 假期日常長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同HolidaySmart 假期日常相關既事物~投稿可以傳送到 holiday@presslogic.com比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!
👉🏻 即刻Follow我哋Instagram holidaysmart.hk
Share to Facebook