大陸傳媒公佈「最討厭藝人」 爆紅G.E.M.竟上榜？歷年「耍大牌」事件一覽

大陸傳媒早前公開由記者選出嘅「最討厭藝人」，其中並未公開藝人全名，有網民推測喺大陸爆紅嘅G.E.M.鄧紫棋都有上榜！一文睇鄧紫棋歷年得罪傳媒被封「宇宙G.E.M.」嘅事件。

大陸傳媒以代號「網劇小花」、「卡姿蘭大眼小鮮肉」指有兩位以2020年網劇走紅嘅演員，紅咗之後翻面唔認人，「網劇小花」出席活動遲到，約採訪要人等5個鐘更窒記者，態度不專業；「卡姿蘭大眼小鮮肉」配合度極低，反復推遲採訪時間兼耍大牌。有網民估兩人分別係劇集《傳聞中的陳芊芊》嘅女主角趙露思同男主角丁禹兮。

另外有攝影師喺群訪時用手機影咗「恐崩圖頂流」一張相，保鏢直接衝上嚟，要求當面刪除照片，唔刪唔畀走。有人猜測係拍《陳情令》爆紅嘅肖戰或王一博。

榜上有名嘅仲有「金曲小天后」，提示係「創作和唱功都讓人服氣，2020年有綜藝播出。」令人想到G.E.M.鄧紫棋。

「金曲小天后」上榜係因為採訪時問到感情問題，佢當時無表現出抵觸，工作人員亦無攔問題，但事後「小天后」大發雷霆，表示關於感情嘅內容全部唔畀寫。記者仲以為佢近期同男友分咗手，點知當晚佢就直接喺微博公開晒恩愛，直指佢「只許自己放火，不許媒體點燈」。

其實G.E.M.多年嚟負面新聞不斷，2013年，G.E.M.被樂壇大前輩甄妮公開指責「無家教」，見到佢唔打招呼，令G.E.M.事後要道歉。

到2014年佢返大陸參加《我是歌手2》一夜爆紅，之後被指巡演、出席活要求國際級待遇及天價歌酬，演唱會門票價格仲貴過歌神張學友，被封為「宇宙G.E.M.」。

唔止試過單方面腰斬台灣傳媒嘅訪問，錄影《康熙來了》又突然改唱新歌，喺巡迴演唱會香港站更強硬要求香港傳媒配合做訪問，否則取消記者會。

到2015年，《我是歌手》籌備舉行顛峰會，G.E.M.被爆堅持唱新歌，結果激嬲總導演洪濤，對方更公開喺微博放言：「你不換歌，我們換人！晚安！」鄧紫棋其後喺微博發長文「飲水思源」疑似回應事件，最終G.E.M.亦未有出演節目。

除咗「金曲小天后」之外，榜上更有「撕前任小花」、「媽寶小生」、「打不了麻將的流量」、「格格的姐妹」、「大閘蟹小花」。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）