7 個方法令又凍又腍嘅薯條都可以重拾滋味！原來同咖哩料理勁夾呀！

鍾意食薯條嘅人有好多，雖然大家都鍾意唔同口感，但相信冇人會唔鍾意熱辣辣、脆卜卜嘅薯條嘅！吓，咁凍咗又腍晒嘅薯條點算呀？今日就嚟教大家幾個方法，等又凍又腍嘅薯條都可以「起死回生」，重拾美味！

最近，日本日清就喺 Twitter 度發文：「相信人類咁耐以嚟有個好大嘅困擾：到底凍咗嘅薯條點樣先會好食呢？」

唔知你係咪都曾經遇過依個問題？有陣時食得慢咗，又或者想擺埋一邊，等陣先慢慢享受依份美味，但好多時換嚟嘅係已經又凍又腍嘅薯條，完全不及佢熱辣辣又脆卜卜嘅時候。

Photo from Pinterest

講到依度，日清就建議大家試吓將不再脆口嘅凍薯條放入咖哩味嘅食物入面，佢哋就拎咗自家出品嘅咖哩味杯麵做示意圖。

Photo from cupnoodle_jp@Twitter

日清將凍晒嘅腍薯條放咗入佢哋嘅咖哩杯麵入面，打橫一條條嘅薯條變成杯麵嘅配料，令到杯麵嘅口感同味道變得更多元化，而薯條吸咗咖哩味嘅湯汁之後亦都別有一番風味。

好多網民都大讚日清依個建議，覺得依個食法好似天才咁醒目，而且極有創意，吸到超過 10 萬個 Like 同埋近 3 萬個分享。

人類の長年の課題であった、冷めたフライドポテトをおいしく食べる方法について考えていたのですが、「カップヌードルカレーにぶち込む」という解決方法にたどり着きました。みなさんもぜひやってみてください。#カレーの日 pic.twitter.com/UvjyX3MS5h

— カップヌードル (@cupnoodle_jp) January 22, 2021

同時都有網民指出：依種食法唔係咩新鮮事啦！原來，喺大阪都已經有餐廳提供緊類似嘅「薯條麵食」。

Photo from VxNxsnoOoH2ffGQ@Twitter

Photo from VxNxsnoOoH2ffGQ@Twitter

或者上面將薯條「起死回生」嘅方法並唔適合你嘅口味，但其實仲有其他方法可以令到又凍又腍嘅薯條變番好好味㗎！

1. 掉入微波爐，簡單又方便。唔少人都應該試過？

Photo from Pinterest

2. 簡單、直接嘅方法就係再炸！依家家家戶戶都有部氣炸鍋，只要大家放入去，再炸番幾分鐘，佢哋又會變番做又熱又脆啦！如果你屋冇氣炸鍋都冇問題，可以彷效氣炸鍋嘅原理，將薯條倒入紙袋，再拎風筒吹幾分鐘。

Photo from Wendy's Georgia@Facebook

3. 唔少網民會將薯條蘸落其他嘢度然後再食，例如粟米濃湯同雪糕等等。唔知依個方法又中唔中你口味呢？

4.有人選擇洗走薯條嘅油，然後整碎，再加隻烚蛋落去，攪勻當係薯仔沙律咁食。

Photo from Pinterest

5. 如果屋企有焗爐，可以選擇放啲芝士喺面，然後拎入焗爐度焗，拎番出嚟一定好好味呀！

6. 如果唔介意做多幾步，可以將薯條整做薯餅，切碎佢哋再壓扁加料，就可以變成各種類型嘅薯餅㗎啦！

薯仔本身就係可以千變萬化嘅食物，所以薯條都可以有咁多種嘅食法，入面一定有種啱你口味！如果你自己有更好嘅食譜，不妨同大家 Share 吓，一齊享用依份滋味呀！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）